LIC New Jeevan Shanti Plan : ఎల్​ఐసీ నయా ప్లాన్​.. జీవితాంతం ఏటా రూ.1,42,508 పెన్షన్​.. అర్హతలు ఇవే!

LIC New Jeevan Shanti Plan : ప్రభుత్వ రంగ సంస్థ లైఫ్​ ఇన్సూరెన్స్ కార్పొరేషన్ ఆఫ్ ఇండియా.. 'LIC న్యూ జీవన్ శాంతి (ప్లాన్ నం 858)' పేరుతో డిఫర్డ్​ యాన్యూటీ ప్లాన్​ను తీసుకువచ్చింది. మరి ఈ పాలసీ తీసుకోవడానికి కావాల్సిన అర్హతలు, పాలసీ వల్ల కలిగే ప్రయోజనాలు ఏమిటో ఇప్పుడు తెలుసుకుందామా?

LIC New Jeevan Shanti Plan : దేశంలో అనేక బీమా సంస్థలు వివిధ రకాల పాలసీలను తమ కస్టమర్ల కోసం ప్రవేశ పెడుతుంటాయి. అయితే చాలా మంది ఎల్​ఐసీ (లైఫ్​ ఇన్సూరెన్స్​ కార్పొరేషన్ ఆఫ్ ఇండియా​) అందించే పాలసీలనే ఎక్కువగా కొనుగోలు చేయడానికి మొగ్గు చూపుతారు. ఎందుకంటే దీనికి ప్రభుత్వ హామీ ఉంటుంది. ఎల్​ఐసీ తమ కస్టమర్ల కోసం ఎప్పటికప్పుడు సరికొత్త పాలసీలను అందుబాటులోకి తెస్తూ ఉంటుంది. అందులో భాగంగా ఎల్​ఐసీ న్యూ జీవన్​ శాంతి పాలసీ (ప్లాన్ నం. 858) ని తీసుకొచ్చింది.

'LIC న్యూ జీవన్ శాంతి'​ పాలసీ అంటే..?
LIC New Jeevan Shanti Plan Details : 'LIC న్యూ జీవన్ శాంతి'​ పాలసీ అనేది నాన్-లింక్డ్​, నాన్​-పార్టిసిపేటెడ్​ యాన్యుటీ ప్లాన్. వాస్తవానికి ఒకేసారి పెద్ద మొత్తంలో ప్రీమియం చెల్లించి ఈ ఎల్​ఐసీ జీవన్​ శాంతి ప్లాన్​ను కొనుగోలు చేయాల్సి ఉంటుంది. ఈ ప్లాన్​లో అందించే యాన్యుటీ రేట్లకు గ్యారంటీ ఉంటుంది. అంటే మనం ఈ పాలసీ తీసుకునే సమయంలోనే.. మనకు రావాల్సిన పెన్షన్​ నిర్ధరణ అవుతుంది.

న్యూ జీవన్​ శాంతి ప్లాన్​లో తక్షణమే పెన్షన్​ ఇచ్చే ఆప్షన్​ను ఎంచుకోవచ్చు. లేదా కొంత కాలం తరువాత పెన్షన్​ వచ్చేలా ఏర్పాటు చేసుకోవచ్చు. అంటే మీరు రెగ్యులర్​గా ఆదాయం రావాలని కోరుకుంటే ఇమ్మీడియెట్​ యాన్యుటీ ప్లాన్​ను ఎంచుకోవచ్చు. లేదా కొంతకాలం తరువాత డబ్బు కావాలని అనుకుంటే గనుక డిలేయిడ్​ యాన్యుటీ ప్లాన్​ను తీసుకోవాల్సి ఉంటుంది.

ఈ పాలసీలో 2 రకాల యాన్యుటీ ప్లాన్​లను అందిస్తుంది ఎల్​ఐసీ.

• డిఫర్డ్​ యాన్యుటీ ఫర్​ సింగిల్ లైఫ్​
• డిఫర్డ్​ యాన్యుటీ ఫర్​ జాయింట్​ లైఫ్​

డిఫర్డ్​ యాన్యూటీ ప్లాన్​ అంటే ఏమిటి..?
డిఫర్డ్​ యాన్యూటీ ప్లాన్​ అనేది ఒక బీమా ఒప్పందం​. ఇందులో పాలసీదారు బీమా సంస్థ నుంచి ప్రతి నెలా ఆదాయాన్ని పొందుతాడు. లేదంటే భవిష్యత్తులో ఒకేసారి పెద్ద మొత్తంలో నగదును అందుకుంటాడు. ఇది మనం ఎంచుకునే ప్లాన్​పై ఆధారపడి ఉంటుంది.

'LIC జీవన్ శాంతి ప్లాన్‌'ను ఎవరు కొనుగోలు చేయవచ్చు?
Eligibility For LIC New Jeevan Shanti : కనీసం 30 ఏళ్లు నిండిన లేదా అంతకంటే ఎక్కువ వయస్సు ఉన్న వారెవరైనా 'LIC జీవన్ శాంతి ప్లాన్‌'ను కొనుగోలు చేయవచ్చు. గరిష్ఠంగా 79 ఏళ్ల వయస్సున్న వారు కూడా ఈ ప్లాన్​కు అర్హులు. ఈ పాలసీ ప్లాన్​ను ఎంచుకునే ముందు మీరు బాగా గుర్తుపెట్టుకోవాల్సిన విషయం ఏంటంటే. మీరు పాలసీ ప్రారంభంలో ఎంచుకున్న కాలవ్యవధిని.. భవిష్యత్తులో మార్చుకోవడానికి వీలుండదు.

గరిష్ఠ పరిమితులు లేవు..!
ఈ పాలసీని తీసుకునే సమయంలోనే సంస్థ నిర్దేశించిన కనీస మొత్తాని చెల్లించి ప్లాన్​ను కొనుగోలు చేయాల్సి ఉంటుంది. కాగా, దీని కనీస కొనుగోలు ధరను రూ.1.5 లక్షలుగా ఫిక్స్​ చేశారు. గరిష్ఠ కొనుగోలు ధర, యాన్యుటీ సహా ఇతర నిబంధనలకు ఎటువంటి గరిష్ఠ పరిమితులు లేవు.

ఇలా చెల్లించవచ్చు..!
ఈ ప్లాన్​లో ఉన్న మరో సౌలభ్యం ఏంటంటే ఇందులోనూ నెలవారీగా, మూడు నెలలకు ఒకసారి, ఆరు నెలలకోసారి లేదా ఏడాదికి ఇలా మన ఆర్థిక పరిస్థితుల ఆధారంగా ప్రీమియంలను చెల్లించే అవకాశం ఉంటుంది.

12 సంవత్సరాల వరకు..
ఈ స్కీమ్​ కింద 12 సంవత్సరాల వరకు పెన్షన్​ను వాయిదా వేసుకోవచ్చు. వాయిదా వేసిన యాన్యుటీతో కనీసం ఒక సంవత్సరం లేదా గరిష్ఠంగా పన్నెండు సంవత్సరాల తర్వాత పెన్షన్​ను చెల్లిస్తారు. ఒకేసారి ప్రీమియం మొత్తాన్ని కట్టేస్తే పెన్షన్​ను వెంటనే అందిస్తారు.

ఎంత పెన్షన్ పొందవచ్చు..!
LIC New Jeevan Shanti Plan Calculator : ఉదాహరణకు మీరు 30 ఏళ్ల వయస్సులో రూ.10 లక్షలతో ఎల్​ఐసీ న్యూ జీవన్ శాంతి పాలసీని 5 సంవత్సరాల డిఫర్డ్​ (వాయిదా) యాన్యుటీతో కొన్నారనుకోండి. మీ 35 ఏళ్ల వయసులో మీరు రూ.86,784ను పెన్షన్​ కింద పొందుతారు. అదే 12 సంవత్సరాలు డిఫర్డ్​(వాయిదా) యాన్యుటీతో కొనుగోలు చేస్తే మీకు 42 ఏళ్లు వచ్చేసరికి రూ.1,32,920 వార్షిక పెన్షన్​ను పొందవచ్చు. అలాగే 45 ఏళ్ల వయసులో రూ.10 లక్షలతో పాలసీని కొనుగోలు చేస్తే 5 ఏళ్ల తర్వాత వార్షిక పెన్షన్​ కింద రూ.90,456 మీకు అందుతుంది. అదే 45 ఏళ్ల వయస్సులో 12 ఏళ్ల డిఫర్డ్​(వాయిదా) యాన్యుటీ కింద కొంటే గనుక రూ.1,42,508ను వార్షిక పెన్షన్​గా అందుకుంటారు.