Joint Bank Account Benefits : జాయింట్​ అకౌంట్​ అంటే ఏంటి? అదెలా పని చేస్తుంది? లాభమెంత?

Joint Bank Account Benefits : భవిష్యత్​లో ఎదురయ్యే భారీ ఆర్థిక అవసరాలను జాయింట్​ అకౌంట్​ పద్ధతి ద్వారా సులువుగా తీర్చుకోవచ్చు. అయితే ఇంతకీ జాయింట్ అకౌంట్​ అంటే ఏంటి? దీనిని ఎంతమంది కలిసి ఓపెన్​ చేయవచ్చు? దీని వల్ల ఎవరికి ఎంత లాభం తదితర వివరాలు మీ కోసం.

Joint Bank Account Benefits : దంపతులు మూడు బ్యాంకు ఖాతాలను కలిగి ఉండాలని ఆర్థిక నిపుణులు సిఫార్సు చేస్తుంటారు. సాధారణంగా భార్య లేదా భర్త సంపాదించే సొమ్ము మొత్తం తమ పేరిట ఉన్న వ్యక్తిగత ఖాతాల్లోకే వెళ్తాయి. అయితే ఈ ఖాతాల్లో ఎంత జమచేయాలి అని దానిపై హక్కు మాత్రం ఇండివిజువల్ అకౌంట్​ హోల్డర్​కు మాత్రమే ఉంటుంది. అలా నిర్దేశించుకున్న సదరు మొత్తాన్ని పర్సనల్​ అకౌంట్​లో ఉంచుకొని మిగతా డబ్బును ఇద్దరు లేదా అంతకంటే ఎక్కువమంది కలిసి నిర్వహించే జాయింట్ అకౌంట్లకు బదిలీ చేస్తుంటారు.

జాయింట్ అకౌంట్​ అంటే ఏంటి..?
జాయింట్ అకౌంట్ అనేది ఇద్దరు లేదా అంతకంటే ఎక్కువ మంది వ్యక్తులు కలిసి భాగస్వామ్యంతో నిర్వహించే ఒక బ్యాంక్ ఖాతా. సాధారణంగా చాలా బ్యాంకులు గరిష్ఠంగా నలుగురిని మాత్రమే ఈ తరహా అకౌంట్స్​ను తెరిచేందుకు అనుమతిస్తున్నాయి. అయితే ఈ జాయింట్​ ఖాతా ద్వారా అనేక ప్రయోజనాలను ప్రతి ఖాతాదారుడు పొందవచ్చు. ఈ ఖాతా సాయంతో డెబిట్​ కార్డులు లేదా ఆన్​లైన్​ ద్వారా కూడా ఇందులోని డబ్బును ఖాతాదాలులు సులభంగా వినియోగించుకోవచ్చు. అంతేకాకుండా ఇది బిల్లు చెల్లింపుల ప్రక్రియను సులభతరం చేస్తుంది. అలాగే ఖర్చులను ట్రాక్​ చేసే ఒక సాధనంలా కూడా ఈ జాయింట్​ అకౌంట్​ పనిచేస్తుంది.

జాయింట్​ అకౌంట్​తో..
అద్దె ఖర్చులు, యుటిలిటీ బిల్లుల చెల్లింపులు, కిరాణా సామగ్రి కొనుగోలుతో పాటు వినోదం కోసం అయ్యే వ్యయం లాంటి ఉమ్మడి ఖర్చులను జాయింట్​ ఖాతా ద్వారా నెరవేర్చుకోవచ్చు. అంతేకాకుండా ఇందులో డబ్బులను మిగతావారితో కలిసి ఉమ్మడిగా ఆదా చేసుకోవచ్చు. తద్వారా భవిష్యత్​లో ఎదురయ్యే ఆర్థిక అవసరాలను తీర్చుకునేందుకు ఇవి ఎంతగానో ఉపయోగపడతాయి.

అందరికీ సమాన హక్కులు ఉంటాయి..
సాధారణంగా పర్సనల్​ అకౌంట్స్​ ఉన్నవారు ప్రతిసారి వారు చేసే ఖర్చులు, పొదుపుల కోసం ఇతరుల అనుమతి తీసుకోవాల్సిన అవసరం అస్సలు ఉండదు. అదే జాయింట్​ అకౌంట్​లో అయితే కచ్చితంగా అవతలి వ్యక్తి లేదా ఖాతాదారుడిని అనుమతి తప్పనిసరిగా తీసుకోవాలి. ఏదైనా లావాదేవీ చేసేటప్పుడు అతడిని సంప్రదించాలి. ఈ రకం ఖాతాల్లో డిపాజిట్లు కానీ విత్​డ్రాలు గానీ చేస్తే​ జాయింట్ అకౌంట్​లో భాగస్వామిగా ఉన్న వేరే వ్యక్తికి సమాచారం ఇవ్వాలి. అయితే ఇలాంటివి చేసేటప్పుడు ఒకరినొకరు విశ్వసించుకోవడం అనేది చాలా ముఖ్యం. కాగా, ఇందులో ప్రతి ఖాతాదారుడికి సమాన హక్కులు ఉంటాయి. అవసరమైతే ఖాతాను కూడా క్లోజ్​ చేయవచ్చు.

ఎవరితోనైనా తెరవచ్చు..
జాయింట్​ అకౌంట్​ను కేవలం భార్య లేదా భర్తతో మాత్రమే కాదు.. తల్లి, తండ్రి, తోబుట్టువులు, పిల్లలు, బిజినెస్ పార్టనర్ ఇలా ఎవరితోనైనా కలిసి తెరవచ్చు.

లాభాలు..

• జాయింట్​ అకౌంట్​.. దంపతుల్లో ఆర్థిక క్రమశిక్షణను పెంపొందిస్తోంది. ఇద్దరి మధ్య ఉండే నమ్మకం పరస్పరంగా బలపడుతుంది.
• ఈ ఖాతా.. భార్యాభర్తలు ఇద్దరికి సమానంగా ఉండే ఆర్థిక లక్ష్యాలను సులువుగా నెరవేరుస్తుంది.
• లోన్స్​, EMIలను సకాలంలో చెల్లించేందుకు జాయింట్​ అకౌంట్​ ఉపయోగపడుతుంది.

గుర్తుంచుకోవాల్సిన విషయాలు..

• జాయింట్ బ్యాంక్​ అకౌంట్​ పద్ధతిలో ప్రతి వ్యక్తికి ఖాతాలో డబ్బును డిపాజిట్ చేసే హక్కు ఉంటుంది. అంతేకాకుండా డబ్బును ఉపసంహరించుకోవచ్చు. ఇలా ఆ ఖాతాను మెయింటేన్​ చేయవచ్చు.
• ఈ జాయింట్ ఖాతాపై ఒక్క వ్యక్తి మాత్రమే ఎక్కువ నియంత్రణను కలిగి ఉన్నప్పటికీ.. ఇందులో డబ్బు జమ చేసిన తర్వాత అందరికీ సమాన హక్కులు లభిస్తాయి.
• జాయింట్​ ఖాతాలోని ఇతర ఖాతాదారుడిపై పూర్తి విశ్వాసం ఉంచాలి. ఎలాగంటే మీకు కష్టపడి సంపాదించిన సొమ్మును జాయింట్​ ఖాతాలో జమ చేసినప్పుడు దానిని వేరే అకౌంట్​ హోల్డర్​ సమర్థవంతంగా నిర్వహించగలడు అనే నమ్మకాన్ని మనం అతడిపై ఉంచాలి.
• ఒకవేళ ఒక్క ఖాతాదారుడు అకౌంట్​ను మూసేయాలి అనుకుంటే మూసేయవచ్చు.
• జాయింట్ ఖాతాను నిర్వహించే విధానానికి సంబంధించిన నిర్ణయాన్ని ఖాతాదారులే ఎంచుకోవచ్చు.
• ఎన్​ఆర్​ఐలు కూడా ఇండియన్​ సిటిజెన్​తో కలిసి​ జాయింట్ అకౌంట్​ను ఓపెన్ చేసుకోవచ్చు.
• అయితే జాయింట్ అకౌంట్‌లలో కొంత రిస్క్​ కూడా ఉంటుంది. ఒక్కోసారి మీ భాగస్వాములలో ఒకరు రుణాన్ని కట్టకుండా ఎగవేస్తే దానికి సంబంధించిన పరిణామాలను మీరూ ఎదుర్కోవాల్సి వస్తుంది.
• ఐటీఆర్​ ఫైలింగ్​లు లాంటి కొన్ని వ్యక్తిగత అంశాలకు ఈ జాయింట్​ అకౌంట్​ భంగం కలిగించవచ్చు.

అందరి మధ్య ఒప్పందంతో వీటిని మార్చవచ్చు..!
మీరు నిర్వహిస్తున్న జాయింట్​ అకౌంట్​ బాధ్యతలను మీరు వేరే వ్యక్తికి కూడా అప్పగించవచ్చు. అయితే ఇందుకు 'పవర్​ ఆప్​ అట్టార్నీ' అనే ఆర్డర్​ కాపీని బ్యాంకులకు సమర్పించాల్సి ఉంటుంది. ఫిక్స్‌డ్-టర్మ్ డిపాజిట్‌ల విషయంలో అకౌంట్​ను క్లోజ్ చేయాలా లేదా దానిని రెన్యూవల్​ చేయాలా అనే దానికి సంబంధించిన సూచనలను ఖాతాదారులు ఇవ్వవచ్చు.

జాయింట్​ అకౌంట్​లో రకాలు..
Types Of Joint Accounts :
జాయింట్​..
Joint : జాయింట్​ అకౌంట్​లో జరిగే అన్ని లావాదేవీలకు ఇద్దరు ఖాతాదారులు బాధ్యులు. అందుకని వీటికి సంబంధించిన పత్రాలపై ఇద్దరి సంతకం తప్పనిసరిగా ఉండాలి. దీనిని ఇరువురు ఆమోదించాలి. ఒకవేళ ఇద్దరు అకౌంట్​ హోల్డర్స్​లో ఎవరైనా ఒకరు చనిపోతే ఆ ఖాతాను మూసివేస్తారు. అనంతరం అందులోని బ్యాలెన్స్​ను బతికి ఉన్న ఖాతాదారుడికి బదిలీ చేస్తారు.

ఇద్దరి సమ్మతి తప్పనిసరి​..
Joint or Survivor : జాయింట్​ ఖాతాకు సంబంధించి జరిగే ప్రతి ట్రాన్సాక్షన్​కు ఇద్దరు ఖాతాదారుల అనుమతి అవసరం. లావాదేవీకి సంబంధించిన ప్రతి డాక్యూమెంట్​పై ఇద్దరు కచ్చితంగా సంతకం చేయాలి. దురదృష్టవశాత్తు ఇద్దరిలో ఒకరు మరణిస్తే, జీవించి ఉన్న వ్యక్తి ఆ ఖాతాను కొనసాగించవచ్చు.

అసలూ, వడ్డీ ఆయనకే..
Either or Survivor : ఇద్దరు వ్యక్తులతో తెరిచిన జాయింట్ అకౌంట్​ను ఇద్దరిలో ఎవరైనా ఒకరు మెయింటేన్​ చేయవచ్చు. ఒకవేళ ఖాతాదారుల్లో ఒకరు చనిపోతే ఖాతాలోని బ్యాలెన్స్​, దానిపై వచ్చే వడ్డీ మొత్తం బతికి ఉన్న వ్యక్తికి చెందుతుంది.

నామినీకి ఎలాంటి హక్కులు ఉండవు..
Former or Survivor : ఇద్దరు వ్యక్తులు కలిసి ఓపెన్​ చేసిన జాయింట్ అకౌంట్​ను ఒక్క వ్యక్తి మత్రమే నిర్వహించవచ్చు. ఇలా తాను బతికి ఉన్నంత కాలం చేయవచ్చు. ఒకవేళ ఖాతాను ఆపరేట్​ చేసే వ్యక్తి హఠాత్తుగా మరణిస్తే దానిని బతికి ఉన్న మరో వ్యక్తి కొనసాగించవచ్చు. కొన్ని సందర్భాల్లో బతికి ఉన్న మరో వ్యక్తియే ముందుగా చనిపోతే ఆ ఖాతాను ఇంకో వ్యక్తి నిర్వహించుకోవచ్చు. అలాగే జాయింట్​ అకౌంట్​లోని ఇద్దరు వ్యక్తులకు సంబంధించి ఏ నామినీకి కూడా ఈ ఖాతాపై ఎటువంటి హక్కులు ఉండవు.

అతను చనిపోతే వాళ్లందరికీ..
Anyone or Survivor/s: జాయింట్​ అకౌంట్​లో ఇద్దరు కంటే ఎక్కువ ఖాతాదారులు ఉన్నట్లయితే, వారిలో ఎవరైనా ఒకరు ఖాతాను నిర్వహించే బాధ్యతను తీసుకువచ్చు. దీనికి ఇతర ఖాతాదారులు అనుమతి తప్పనిసరి. ఒకవేళ ఖాతాను మెయింటేన్​ చేసే వ్యక్తి అనుకోకుండా మరణిస్తే.. అందులోని బ్యాలెన్స్​, వడ్డీ మొత్తం జీవించి ఉన్న మిగతా ఖాతాదారులకు చెందుతుంది.