గూగుల్​లో 30వేల మంది ఉద్యోగుల లేఆఫ్! AI టెక్నాలజీనే కారణం

Google Layoffs 30000 Employees : ప్రముఖ సెర్చ్​ ఇంజిన్ సంస్థ గూగుల్‌లో ఆర్టిఫీషియల్ ఇంటెలిజెన్స్ కారణంగా భారీ స్థాయిలో ఉద్యోగాలు పోనున్నాయట! ఏఐ వల్ల 30వేల మంది ఉద్యోగులకు గూగుల్ ఉద్వాసన పలకనుందని సమాచారం.

Google Layoffs 30000 Employees : ఆర్టిఫీషియల్ ఇంటెలిజెన్స్ (AI) కారణంగా ప్రముఖ సెర్చ్ ఇంజిన్ సంస్థ గూగుల్​ ఉద్యోగులు తమ జాబ్స్ కోల్పోవాల్సిన పరిస్థితి ఏర్పడింది. AI టెక్నాలజీ వినియోగంలో భాగంగా గూగుల్ భారీ స్థాయిలో ఉద్యోగులను తొలగించే అవకాశం ఉంది. ఆర్టిఫీషియల్ ఇంటెలిజెన్స్ ద్వారా పనులు సులభంగా, వేగంగా పూర్తి చేయొచ్చు. అందుకే పెద్దపెద్ద టెక్ కంపెనీలన్నీ ఈ టెక్నాలజీని వినియోగిస్తున్నాయి. గూగుల్ కూడా ఆర్టిఫీషియల్ ఇంటెలిజెన్స్ వినియోగంపై దృష్టి పెట్టింది.

30వేల మందికి గుడ్​బై!
Is Google Laying Off Employees : ఆర్టిఫీషియల్ ఇంటెలిజెన్స్ (AI) వినియోగంలో భాగంగా ఈ టెక్ దిగ్గజం దాదాపు 30 వేల మంది ఉద్యోగులను తొలగించే యోచనలో ఉన్నట్లు తెలుస్తోంది. ప్రధానంగా సేల్స్ రంగంలో AI వినియోగం ద్వారా మంచి ఫలితాలు వస్తున్నందున ఆ రంగంలో ఆర్టిఫీషియల్ ఇంటెలిజెన్స్ వినియోగించాలని నిర్ణయించింది. దీంతో సేల్స్ రంగంలో పనిచేసే ఉద్యోగులపై ప్రభావం పడనుంది.

Google Layoffs 2024 : గూగుల్ ఇప్పటికే యాడ్స్ క్రియేషన్​ కోసం PMax ఏఐ ఆధారిత టూల్స్ వినియోగిస్తోంది. ప్రకటనల రూపకల్పన, ప్లేస్‌మెంట్ వంటి విషయాల్లో అడ్వటైజర్లకు సహకరిస్తోంది PMax టూల్. అనేక విషయాల్లో స్వతంత్ర నిర్ణయాలు తీసుకునే స్థాయికి చేరుకుంది. అప్పటికప్పుడు రియల్ టైమ్​ యాడ్లలో మార్పులు చేస్తూ ప్రకటనల ప్రభావశీలతను ఈ టెక్నాలజీ పెంచుతోంది.

ఈ టూల్ కారణంగా కంపెనీ వార్షిక ఆదాయం పెరిగింది. ఏఐ సామర్థ్యంతో పాటు ఉద్యోగుల అవసరం తగ్గడం వల్ల గూగుల్​కు భారీగా లాభాలు వచ్చాయి. ఫలితంగా ఉద్యోగుల అవసరం తగ్గుతుండటం వల్ల ఎంప్లాయిస్​లో లేఆఫ్స్ భయాలు మొదలయ్యాయి. రాబోయే రోజుల్లో మరిన్ని AI టూల్స్​ను ఉపయోగించాలని గూగుల్ నిర్ణయించడం వల్ల కంపెనీ ఉద్యోగులపై గట్టి ప్రభావం పడే అవకాశం ఉంది.

Google Layoffs 2023 : ఈఏడాది జనవరిలో సుమారు 12వేల మందిని ఉద్యోగులను ఇంటికి పంపించేసింది గూగుల్​. ఈ విషయంపై ఓ ఉద్యోగి ఇటీవలే సీఈఓ సుందర్ పిచాయ్​ను ఓ ప్రశ్న అడిగారు. "భారీ స్థాయిలో మీరు తగ్గించిన శ్రామిక శక్తికి ఏడాది అయింది. మరి మన వృద్ధిపై మీ నిర్ణయం ఎలాంటి ప్రభావం చూపింది?" అని ప్రశ్నించారు. కంపెనీ తీసుకున్న అత్యంత కష్టతరమైన నిర్ణయాల్లో అదొకటి అని సుందర్ పిచాయ్​ సమాధానమిచ్చారు. ఉద్యోగులను తొలగించడం కష్టమే గానీ తప్పలేదని తెలిపారు. ఆర్థిక వ్యవస్థలో మార్పుల కారణంగా అలా చేయాల్సి వచ్చిందని ఆయన పేర్కొన్నారు.