Critical Illness Insurance Policy : రాజీవ్‌ ప్రముఖ కంపెనీలో సేల్స్‌ మేనేజర్‌. తన బృందాన్ని సమర్థంగా నడిపిస్తూ మంచి పేరు తెచ్చుకున్నాడు. ఈ క్రమంలో ఎదురయ్యే ఒత్తిడి అతన్ని ధూమపానానికి అలవాటు చేసింది. ఒకరోజు ఉదయం రాజీవ్‌ పనిలో ఉండగానే అకస్మాతుగా కుప్పకూలిపోయాడు. సహచరులు వెంటనే అతన్ని ఆసుపత్రికి తరలించారు. ప్రాణాపాయం లేనప్పటికీ పక్షవాతం వచ్చినట్లు వైద్యులు చెప్పారు. అతని శరీరం ఎడమ భాగం పక్షవాతానికి గురైంది. తను పని చేస్తున్న కంపెనీ నుంచి బృంద బీమా సౌకర్యం ఉంది. అది చికిత్స ఖర్చులను మాత్రమే చెల్లిస్తుంది. ఇప్పుడు రాజీవ్‌కు నిరంతర వైద్య చికిత్స అవసరం. ఉద్యోగం కొనసాగించే పరిస్థితి లేదు. ఈ క్రమంలో అతని కుటుంబానికి ఒక్కసారిగా ఆర్థిక కష్టాలు వచ్చాయి.
ఇటీవల ఇలాంటి సమస్యలు చాలామందిలో చూస్తున్నాం. గుండెపోటు, క్యాన్సర్‌, పక్షవాతం, కాలేయ సంబంధిత వ్యాధులు.. ఇలా జీవన శైలి వ్యాధుల జాబితా పెరిగిపోతూనే ఉంది. సాధారణ ఆరోగ్య బీమా పాలసీలు చికిత్సకు పరిహారం చెల్లించినా.. ఆ తర్వాత అయ్యే వైద్య ఖర్చులకు ఇది ఏమాత్రం సరిపోకపోవచ్చు. ప్రత్యేకించి, దీర్ఘకాల చికిత్స అవసరమయ్యే వ్యాధుల విషయంలో ఆర్థిక వ్యయం తట్టుకోవడం సాధారణ విషయం కాదు. ఇలాంటి సందర్భాల్లోనే క్రిటికల్ ఇల్నెస్ పాలసీలు ఆర్థికంగా రక్షణగా ఉంటాయి.
ఎలా పనిచేస్తాయంటే..
ప్రాణాంతకమైన తీవ్ర వ్యాధులను ప్రాథమికంగా నిర్ధరించినప్పుడే క్రిటికల్ ఇల్నెస్ పాలసీ ఒకేసారి పరిహారాన్ని చెల్లిస్తుంది. చాలా క్రిటికల్ కేర్‌ హెల్త్‌ పాలసీలు కనీస బీమా మొత్తాన్ని రూ.5 లక్షల నుంచి అందిస్తున్నాయి. గరిష్ఠ పరిమితి బీమా సంస్థలను బట్టి మారుతూ ఉంటుంది. ఈ పాలసీలు చెల్లించే పరిహారం వల్ల ఆసుపత్రి నుంచి ఇంటికి వచ్చాక అయ్యే వైద్య ఖర్చులను సులభంగా తట్టుకునేందుకు వీలవుతుంది. బీమా చేసిన వ్యక్తి చికిత్స ఖర్చులకు భయపడాల్సిన అవసరం ఉండదు. బీమా కంపెనీలు సాధారణంగా తీవ్ర వ్యాధులను కొన్ని విభాగాలుగా వర్గీకరిస్తాయి. ఒక్కో విభాగం కింద 100 శాతం బీమా మొత్తాన్ని క్లెయిం చేసుకోవచ్చు. ప్రస్తుతం మార్కెట్లో నాలుగు విభాగాల్లో ఈ క్రిటికల్ ఇల్నెస్ పాలసీలు అందుబాటులో ఉన్నాయి.
- క్యాన్సర్‌, ఓపెన్‌ హార్ట్‌ సర్జరీలు, బైపాస్‌ శస్త్రచికిత్స, గుండె మార్పిడి, కార్డియోమయోపతి, కరోనరీ ఆర్టరీ డిసీజ్‌వంటి గుండె సంబంధిత వ్యాధులు
- మెదడు, రక్త నాళాలకు సంబంధించిన వ్యాధులు, పక్షవాతం, కోమా, అల్జీమర్స్‌ తదితరాలు
- అంధత్వం, చెవుడు, కాలేయం, ఊపిరితిత్తులు, మూత్రపిండాలు తదితర కీలక అవయవాల వ్యాధులు
తేడా ఏమిటి?
పాలసీదారుడు ఏదైనా వ్యాధి బారిన పడినప్పుడు ఒక్కో విభాగంలోని వ్యాధికి 100 శాతం పరిహారం లభిస్తుంది. దీర్ఘకాలంగా ఉన్న తీవ్ర వ్యాధులు కాలక్రమేణా ఇతర వ్యాధులకూ కారణం కావచ్చు. ఇలాంటి సందర్భంలో ఈ పాలసీ ఇచ్చే పరిహారం ఆర్థికంగా సహాయం చేస్తుంది. ఒక వ్యక్తి నాలుగు విభాగాల్లోని వ్యాధుల్లోని ఏదో ఒక వ్యాధితో బాధపడుతున్నట్లు తేలితే.. దాదాపు 400 శాతం వరకూ పరిహారం లభిస్తుంది. సాధారణ ఆరోగ్య బీమా పాలసీలో కేవలం చికిత్స బిల్లులు మాత్రమే చెల్లిస్తారు. మొత్తం పరిహారం అందదు. బీమా చేసిన వ్యక్తి అన్ని వైద్య పరీక్షల నివేదికలు, చికిత్స చేసిన వైద్యుల లేఖ, ఇతర అవసరమైన ధ్రువీకరణలు సమర్పించినప్పుడే క్లెయిం పరిష్కరిస్తారు.
తక్కువ నిరీక్షణతో..
తీవ్ర వ్యాధులకు వర్తించే పాలసీకి తక్కువ నిరీక్షణ వ్యవధి ఉంటుంది. చాలా బీమా సంస్థలు పాలసీ తీసుకున్న 90 రోజుల నుంచి అన్ని విభాగాల్లోని వ్యాధులకూ పరిహారం చెల్లించేందుకు ముందుకు వస్తున్నాయి. మాదకద్రవ్యాలు, మద్యపానం వల్ల ఆరోగ్యం పాడైనప్పుడు పరిహారం ఇవ్వకపోవచ్చు. కొన్ని బీమా సంస్థలు పని చేసే చోట ఉన్న పరిస్థితులనూ పరిగణనలోనికి తీసుకుంటాయి. కాబట్టి, పాలసీ తీసుకునేటప్పుడు ఈ విషయాలను తప్పనిసరిగా గమనించాలి.
ఎవరికి అవసరం..
కుటుంబంలో తీవ్ర వ్యాధుల చరిత్ర ఉంటే క్రిటికల్ ఇల్నెస్ పాలసీని తప్పనిసరిగా పరిశీలించాలి. అధిక ఒత్తిడితో కూడిన పని వాతావరణంలో పనిచేసే వ్యక్తులు, భవిష్యత్తులో తీవ్రమైన అనారోగ్యం బారిన పడే ప్రమాదమున్న జీవన శైలి ఉన్నవారు ఈ పాలసీని ఎంచుకోవచ్చు. చాలామంది అనారోగ్యంతో ఆసుపత్రిలో చేరినప్పుడు బిల్లులు వస్తే చాలు అనే ధోరణితోనే బీమా పాలసీ తీసుకుంటారు. కొన్నిసార్లు అంతకు మంచి ఆలోచించాలి. అనుబంధ వ్యయాలు, పునరావృతం అయ్యే ఖర్చులనూ ఊహించాలి. క్లిష్టమైన వ్యాధులకు ఎప్పుడూ చికిత్స తీసుకుంటూనే ఉండాలి. ఇలాంటి సందర్భాల్లో క్రిటికల్ ఇల్నెస్ పాలసీ తోడ్పడుతుందని గుర్తుంచుకోండి.
- డాక్టర్‌ ఎస్‌.ప్రకాశ్‌, మేనేజింగ్‌ డైరెక్టర్‌, స్టార్‌ హెల్త్‌ అండ్‌ అలీడ్‌ ఇన్సూరెన్స్‌
