భాజపా అధికారంలోకి వచ్చిన తర్వాత తొలిసారిగా నెమ్మదిస్తున్న ఆర్థిక వ్యవస్థకు మద్దతుగా నిలిచేందుకు కీలక నిర్ణయాల్ని ప్రకటించింది రిజర్వ్ బ్యాంకు. వృద్ధికి ఊతమిచ్చేలా... వడ్డీరేట్లను మరోసారి తగ్గించింది.
రెపో రేటును 25 బేసిస్ పాయింట్ల మేర తగ్గించి శుభవార్త అందించింది. 6 నుంచి 5.75 శాతానికి మారుస్తూ నిర్ణయం తీసుకుంది ద్రవ్యపరపతి విధాన కమిటీ-ఎంపీసీ. ఫలితంగా... వడ్డీ రేటు 9 ఏళ్ల కనిష్ఠానికి దిగొచ్చింది. చివరిసారిగా 2010 జులైలో రెపో రేటు 5.75 శాతంగా ఉంది.
రిజర్వు బ్యాంకు ఈ ఏడాది వరుసగా రెపో రేటును మూడుసార్లు 25 పాయింట్ల చొప్పున మొత్తం 75 బేసిస్ పాయింట్లు తగ్గిస్తూ వచ్చింది. రివర్స్ రెపో రేటును 5.50 శాతానికి, బ్యాంకు రేటును 6 శాతానికి చేర్చింది.
ఆర్బీఐ.. బ్యాంకులకు ఇచ్చే రుణాలపై వేసే వడ్డీనే రెపో రేటు. ప్రస్తుతం ఈ రెపో రేటు తగ్గింపుతో.. బ్యాంకులూ వడ్డీ రేట్లను తగ్గించే అవకాశముంది. ఇది గృహ, వ్యక్తిగత, వాహన రుణాల వినియోగదారులకు తీపికబురు. వారి రుణాలపై ఈఎంఐల భారం తగ్గుతుంది.
గత ఫిబ్రవరి, ఏప్రిల్తో పాటు తాజాగా తీసుకున్న వడ్డీరేట్ల తగ్గింపు నిర్ణయాన్ని బ్యాంకులూ అమలుచేయాలని కోరారు ఆర్బీఐ గవర్నర్ శక్తికాంతదాస్.
భవిష్యత్తులోనూ...
వడ్డీ రేట్ల తగ్గింపుతో పాటు ఏకగ్రీవంగా మరో కీలక నిర్ణయం తీసుకుంది ఆర్బీఐ ఎంపీపీ. ద్రవ్యపరపతి విధాన దృక్పథాన్ని న్యూట్రల్ నుంచి అకామొడేటివ్కు మార్చింది. తద్వారా భవిష్యత్లో వడ్డీ రేట్లు మరింత తగ్గిస్తామని సంకేతాలిచ్చింది.
వృద్ధి రేటు అంచనాల తగ్గుదల...
భారత వృద్ధిరేటు.. 2018-19 ఆర్థిక సంవత్సరం చివరి త్రైమాసికంలో 5.8 శాతంతో ఐదేళ్ల కనిష్ఠానికి చేరింది. ఇది గత కొన్ని త్రైమాసికాల్లో చైనా వృద్ధి రేటు కంటే తక్కువే. ఫలితంగా ఈ 2019-20 ఆర్థిక సంవత్సరానికి భారత వృద్ధి రేటు అంచనాలను తగ్గించింది ఆర్బీఐ. 7.2 నుంచి 7 శాతానికి సవరించింది.
ద్రవ్యోల్బణం అంచనాల్లో పురోగతి...
ద్రవ్యోల్బణం అంచనాలను పెంచింది ఆర్బీఐ. 2019-20 ఆర్థిక సంవత్సరం తొలి అర్ధభాగంలో ద్రవ్యోల్బణం 3-3.1 గా నమోదవుతుందని అంచనా వేసింది. చివరిసారి ఏప్రిల్లో జరిగిన సమావేశంలో... ద్రవ్యోల్బణం 2.9 నుంచి 3 శాతం వరకే ఉంటుందని పేర్కొంది కేంద్రబ్యాంకు.
రెండో అర్ధభాగంలో 3.5-3.8 నుంచి 3.4- 3.7 శాతానికి ద్రవ్యోల్బణం అంచనాలను తగ్గించింది.
ద్రవ్యోల్బణాన్ని 4 శాతానికే పరిమితం చేయాలని లక్ష్యంగా నిర్దేశించుకుంది ఆర్బీఐ. అందుకు తగినట్లే ధరల సూచీ అదుపులో ఉంటుందన్న అంచనాలు... భవిష్యత్తులో వడ్డీరేట్ల తగ్గింపుపై ఆశలు పెంచుతున్నాయి.
బ్యాంకులూ తగ్గిస్తేనే...
ఆర్బీఐ రెపోరేటును 25 బేసిస్ పాయింట్లు తగ్గించడాన్ని స్వాగతించారు విశ్లేషకులు. బ్యాంకులూ వినియోగదారుల రుణాల పట్ల ఇలాగే వ్యవహరిస్తే మంచిదనే అభిప్రాయం వ్యక్తం చేశారు వ్యాపార నిపుణులు శేఖర్ రెడ్డి.
''గృహ రుణాలు తీసుకునే వారు, ఇళ్లు కొనుగోలు చేయాలనుకున్న వారికి ఈఎంఐ తగ్గడానికి బ్యాంకులు దోహదపడితే మనకు మంచిది. ఆర్బీఐ రెపో రేట్లు తగ్గిస్తే అది నేరుగా వినియోగదారులకు ప్రయోజనం చేకూర్చినట్లు కాదు. ఆర్బీఐ వడ్డీ రేట్లు పెంచినప్పుడు మాత్రం వెంటనే రుణాలపై వడ్డీలను పెంచేసే బ్యాంకులు.. తగ్గించనప్పుడు మాత్రం నిర్ణీత సమయంలో వినియోగదారులకు ఆ ప్రయోజనాలు కల్పించట్లేదు. ఆర్బీఐ మధ్యవర్తి ద్వారా ఈ ప్రయోజనాలన్నీ వినియోగదారులకు చేరేలా, బ్యాంకులకు సూచించేలా వ్యవహరించాల్సిన అవసరం ఉంది.''
- శేఖర్ రెడ్డి, క్రెడాయ్ మాజీ అధ్యక్షుడు, ప్రముఖ వ్యాపార నిపుణులు
ఎంపీసీ కీలక నిర్ణయాలు...
- రెపో రేటు 25 బేసిస్ పాయింట్ల తగ్గింపు
- రివర్స్ రెపో రేటు 5.50 శాతానికి మార్పు
- బ్యాంకు రేటు 6 శాతానికి చేరుస్తూ నిర్ణయం
- ఆర్టీజీఎస్, నెఫ్ట్ లావాదేవీలపై రుసుముల ఎత్తివేత
- వృద్ధి రేటు అంచనాల్లో తగ్గుదల.. 7.2 శాతం నుంచి 7కు తగ్గిస్తూ ప్రకటన
ద్రవ్యోల్బణం అంచనాల్లో పెరుగుదల.
- తొలి అర్ధభాగంలో 3-3.1 శాతంగా అంచనా
- రెండో అర్ధభాగంలో 3.4-3.7 శాతం నమోదవుతుందని పేర్కొన్న కమిటీ
- ఏటీఎం వినియోగం ఛార్జీలపై సమీక్షకు కమిటీ ఏర్పాటుకు నిర్ణయం
- ఆగస్టు 7న మరోసారి ఎంపీసీ భేటీ
