UPI payments for feature phones: ఫీచర్ ఫోన్లు వాడే వారికి గుడ్న్యూస్. ఇక ఈ ఫోన్లతోనూ డిజిటల్ చెల్లింపులు చేసుకోవచ్చు. ఈ మేరకు 'యూపీఐ123పే' పేరుతో యూపీఐ సేవల్ని ప్రారంభించింది భారతీయ రిజర్వ్ బ్యాంకు(ఆర్బీఐ).
స్మార్ట్ఫోన్ లేని ప్రజలు, ముఖ్యంగా గ్రామీణ ప్రాంతాల వారు యూపీఐ లావాదేవీలు జరుపుకునేందుకు వీలుగా ఈ సేవల్ని తీసుకొచ్చినట్లు తెలిపారు ఆర్బీఐ గవర్నర్ శక్తికాంత దాస్. గత 3 సంవత్సరాలుగా డిజిటల్ చెల్లింపులకు ఊతం ఇచ్చేందుకు ఆర్బీఐ విశేషంగా కృషిచేసిందని గుర్తుచేశారు. ఈ నేపథ్యంలోనే సైబర్ సెక్యూరిటీపై దృష్టి సారించాలని, ఎలాంటి ప్రతికూలతలు తలెత్తకుండా అన్నింటికీ సిద్ధపడేలా వ్యవస్థను రూపొందించాల్సిన అవసరాన్ని నొక్కిచెప్పారు.
డిజిటల్ చెల్లింపుల కోసం 'డిజిసాథీ' అనే 24x7 హెల్ప్లైన్ను కూడా ఆవిష్కరించారు దాస్.
ఇంటర్నెట్ లేకుండానే..
- ఫీచర్ ఫోన్లలో యూపీఐ123పేతో చెల్లింపులు చేసేందుకు ఇంటర్నెట్ అవసరం లేదు.
- స్కాన్ లావాదేవీలు మినహా అన్ని ట్రాన్సాక్షన్స్ చేసే వీలుంటుంది.
- ఈ సౌలభ్యం పొందాలంటే కస్టమర్లు.. తమ బ్యాంకు అకౌంట్ను ఫీచర్ ఫోన్కు లింక్ చేయాల్సి ఉంటుంది.
యూపీఐ ఆధారిత చెల్లింపులు 2016లోనే అందుబాటులోకి వచ్చాయి. కానీ.. ఇది స్మార్ట్ఫోన్లకే పరిమితమైంది. కానీ గ్రామీణ ప్రాంతాల్లో మహిళలు, వృద్ధులు చాలా వరకు ఫీచర్ ఫోన్లను వాడుతున్నారు. ఈ నేపథ్యంలోనే వారి అవసరాల కోసం.. ఆ తరహా మొబైల్స్లోనూ యూపీఐ పేమెంట్స్ చేసుకునేందుకు వీలుగా నిర్ణయం తీసుకుంది కేంద్ర బ్యాంకు.
ఇవీ చూడండి: అదే జరిగితే.. మల్టీప్లెక్స్ వ్యాపారంలో ఇక వాటిదే హవా!
