ఇంటర్నెట్ బ్యాంకింగ్ ద్వారా బ్యాంకు సేవలు పొందటం సులభతరం అయిపోయింది. నగదు బదిలీతో పాటు బిల్లుల చెల్లింపు, పలు ఇతర సేవలు ఇంటర్నెట్ బ్యాంకింగ్ ద్వారా ఇంటి నుంచే సౌకర్యవంతంగా చేసుకోవచ్చు. బ్యాంకుకు వెళ్లి వరుసలో నిలబడే శ్రమను ఇది తగ్గించింది.
ఆన్లైన్ బ్యాంకింగ్ సౌకర్యవంతంగా మారినప్పటికీ సైబర్ మోసాల నుంచి రిస్కు మాత్రం పొంచి ఉంది. అయితే కొన్ని జాగ్రత్తలు తీసుకోవటం ద్వారా వీటిని నివారించుకోవచ్చు. వాటి గురించి తెలుసుకుందాం.
పాస్వర్డ్ల మార్పు
ఇంటర్నెట్ బ్యాంకింగ్ ఖాతాలో మొదటి సారి లాగిన్ అయినప్పుడు బ్యాంకు ఇచ్చిన పాస్వర్డ్ను ఉపయోగించినట్లయితే దానిని మార్చుకోవాలి. ప్రతి నెలా లేదా రెండు నెలలకు ఓ సారి పాస్వర్డ్ మార్చాలి. దీనివల్ల ఖాతా వివరాలు వేరే వారికి తెలిసినా కూడా లాగిన్ అవ్వటం వీలు కాదు. పాస్వర్డ్ను ఎప్పుడూ గోప్యంగా ఉంచుకోవాలి. ఇతరులతో షేర్ చేయడం వల్ల మోసాలు జరిగే అవకాశాలు ఎక్కువగా ఉంటాయి.
పబ్లిక్ కంప్యూటర్లతో లావాదేవీలొద్దు..
ఇంటర్నెట్ సెంటర్లు, లైబ్రరీల్లో సాధారణ కంప్యూటర్లను ఇంటర్నెట్ బ్యాంకింగ్ కోసం వాడకపోవటమే ఉత్తమం. ఇలాంటి ప్రదేశాల్లో రద్దీ ఎక్కువగా ఉంటుంది కాబట్టి మీ ఖాతా వివరాలు ఇతరులు చూసే లేదా తెలుసుకునే అవకాశాలు ఎక్కువగా ఉంటాయి. ఇలాంటి కంప్యూటర్లలో ఇంటర్నెట్ బ్యాంకింగ్ వాడాల్సి వస్తే.. బ్రౌజింగ్ హిస్టరీ, క్యాషేను డిలీట్ చేయాలి.
లాగిన్ ఐడీ, పాస్వర్డ్ సేవ్ చేయమని.. మీ బ్రౌజర్ అనుమతి కోరితే అందుకు అనుమతించకూడదు. అలాగే పబ్లిక్ కంప్యూటర్లను ఉపయోగించినప్పుడు ప్రైవేట్ విండో ఉపయోగించుకోవటం ఉత్తమం.
వివరాలు ఎవరికీ చెప్పొద్దు
ఫోన్లో కానీ, ఈ-మెయిల్ ద్వారా కానీ మీ బ్యాంక్.. ఖాతా, పిన్ వంటి వివరాలు అడగదు. కాబట్టి.. బ్యాంక్ పేరు చెప్పుకుని ఎవరైనా ఓటీపీ, పాస్వర్డ్ కోసం కాల్స్, మెసేజెస్ చేస్తే.. ఎట్టి పరిస్థితుల్లోనూ నమ్మొద్దు.
ఇంటర్నెట్ బ్యాంకింగ్ లాగిన్ పేజీని ఒకటికి రెండు సార్లు చెక్ చేసుకోవాలి. యూఆర్ఎల్లో హెచ్టీటీపీఎస్ ఉంటేనే అది సురక్షితమైన సైట్ అని గుర్తుంచుకోవాలి.
తరచూ చెక్ చేసుకోండి
ఆన్‌లైన్‌లో ఏదైనా లావాదేవీ చేసిన తర్వాత ఖాతాను క్రమం తప్పకుండా తనిఖీ చేసుకోవాలి. ఖాతా నుంచి సరైన మొత్తం మాత్రమే చెల్లింపు అయిందా? అన్నది సరి చూసుకోవాలి. ఒకవేళ ఏమైనా తేడా అనిపిస్తే వెంటనే బ్యాంకును సంప్రదించాలి.
యాంటీ వైరస్..
కంప్యూటర్ను వైరస్ల బారి నుంచి కాపాడుకునేందుకు లైసెన్స్ ఉన్న యాంటీ వైరస్ సాఫ్ట్వేర్ వాడుకోవాలి. పైరేటెడ్ యాంటీ వైరస్లు ఉచితంగా లభించవచ్చు. కానీ వీటిని వాడటం వల్ల కంప్యూటర్కు సరైన రక్షణ అందకపోవచ్చు. యాంటీ వైరస్ సాఫ్ట్ వేర్లకు తరచుగా అప్డేట్లు వస్తుంటాయి. యాంటీ వైరస్ అప్డేటెడ్గా ఉండే విధంగా చూసుకోవాలి. దీనివల్ల ఆన్లైన్ బ్యాంకింగ్ లావాదేవీలు సురక్షితంగా చేసుకోవచ్చు.
ఉపయోగించనప్పుడు నెట్ కనెక్షన్ తొలగించండి
బ్రాడ్బ్యాండ్ ఉపయోగించే చాలా మంది ఇంటర్నెట్ను వాడనప్పుడు డిస్ కనెక్ట్ చేయరు. దీనివల్ల హ్యాకర్లు, ఇతర సైబర్ రకాల మోసగాళ్లు ఇంటర్నెట్ కనెక్షన్ ద్వారా దాడి చేసి.. బ్యాంకింగ్ తదితర వ్యక్తిగత వివరాలను దొంగలించవచ్చు. దీన్ని నివారించేందుకు ఇంటర్నెట్ను డిస్కనెక్ట్ చేసుకోవటం ఉత్తమం.
ఇంటర్నెట్ బ్యాంకింగ్ యూఆర్ఎల్
ఈ-మెయిల్ ద్వారా వచ్చిన లింక్లను ఇంటర్నెట్ బ్యాంకింగ్ కోసం వాడటం కంటే యూఆర్ఎల్ను టైప్ చేసి వాడుకోవటం ఉత్తమం. సైబర్ మోసగాళ్లు ఈ-మెయిల్, మెస్సేజ్ల ద్వారా లింక్లు పంపించి మోసం చేయవచ్చు.
ఇవీ చదవండి:
