చైనా అధ్యక్షుడు షి జిన్పింగ్ తొలిరోజు పర్యటనలో భాగంగా ఆయనతో ప్రధాని నరేంద్రమోదీ ద్వైపాక్షిక వాణిజ్య చర్చలు జరిపారు. చైనాతో భారత్కు ఉన్న వాణిజ్య లోటు అంశంపై జిన్పింగ్తో జరిగిన రెండో అనధికారిక సమావేశంలో మోదీ చర్చించినట్లు.. విదేశీ వ్యవహారాల కార్యదర్శి విజయ్ గోఖలే మీడియాకు వెల్లడించారు. మామల్లపురంలో ఇరు దేశాధినేతలు.. తమ దేశాల దృక్పథాలు, ప్రభుత్వ ప్రాధాన్యతలపై చర్చించారని తెలిపారు.
"మోదీ, జిన్పింగ్ల మధ్య ముఖ్యంగా వాణిజ్య, ఆర్థిక పరమైన చర్చలు సాగాయి. ఇరుదేశాలు ప్రోత్సహించే పెట్టుబడి రంగాలను గుర్తించడం.. వాణిజ్య పరిమాణం, విలువను పెంచుకునే అంశాలపైనా చర్చలు సాగాయి. ఇందులో వాణిజ్య లోటును తగ్గించే అంశాలూ ఉన్నాయి."
-విజయ్ గోఖలే, విదేశీ వ్యవహారాల కార్యదర్శి
భాజపా ప్రభుత్వం ఇటీవల రెండోసారి ఎన్నికైన విషయాన్ని జిన్పింగ్కు గుర్తుచేస్తూ ఇరుదేశాల మధ్య ఆర్థిక అభివృద్ధి అవసరాన్ని మోదీ వివరించారని గోఖలే అన్నారు. దీనికి స్పందనగా వచ్చే నాలుగున్నరేళ్లలో మోదీతో.. సన్నిహితంగా మెలుగుతూ పనిచేసేందుకు ఎదురుచూస్తున్నట్లు జిన్పింగ్ స్పష్టం చేసినట్లు పేర్కొన్నారు.
ఇదీ చూడండి: పడిపోతున్న పారిశ్రామిక ఉత్పత్తి..! రివర్స్ లో అభివృద్ధి..!
