ఆధార్తో అనుసంధానించకపోతే శాశ్వత ఖాతా సంఖ్య (పాన్ నెంబర్) పనిచేయదని తేల్చింది కేంద్ర ప్రత్యక్ష పన్నుల విభాగం(సీబీడీటీ). ఒకవేళ అనుసంధానించనట్లయితే మార్చి 31 తర్వాత పాన్ నెంబర్ పనిచేయదని తెలిపింది. ఈ ప్రక్రియకు ఇప్పటికే పలుమార్లు గడువు పెంచుతూ వచ్చామని.. ప్రస్తుత గడువు తేది మార్చి 31తో ముగియనుందని వెల్లడించింది.
2020, జనవరి 27 నుంచి ఇప్పటివరకు 30.75 కోట్ల పాన్ కార్డులు ఆధార్తో అనుసంధానించారు. అయితే 17.58 కోట్ల కార్డులు ఇప్పటికీ అనుసంధానం కాలేదని గణాంకాలు పేర్కొంటున్నాయి. తాజాగా ఆదాయపన్ను నిబంధనలకు సవరణలు చేపట్టిన సీబీడీటీ.. 114ఏఏఏ సెక్షన్ను చేర్చింది. పాన్ పనిచేయకుండా ఉండే విధంగా నిబంధనలను ఈ సెక్షన్లో ఉటంకించింది.
బాధ్యులు వారే!
ఆధార్ అనుసంధానించని వ్యక్తులు తర్వాత జరగబోయే పరిణామాలకు బాధ్యత వహిస్తారని ఆదాయ పన్ను ప్రకటనలో పేర్కొంది. ఆదాయ పన్ను చట్టంలోని సెక్షన్ 139ఏఏ(2) ప్రకారం 2017, జూన్1 లోపు పాన్ పొందిన వారు తప్పనిసరిగా ఆధార్ను అనుసంధానం చేయాలని సూచించింది.
ఆధార్ను రాజ్యాంగబద్ధం చేస్తూ, తప్పనిసరిగా పాన్తో అనుసంధానించాలని సుప్రీంకోర్టు 2018లో ప్రకటించింది. ఈ మేరకు ఆదాయపన్ను శాఖ ఈ ప్రక్రియ చేపట్టింది.
ఇదీ చూడండి: కోర్టు అనూహ్య తీర్పు.. 100 మొక్కలు నాటాలని జరిమానా!
