కరోనా మహమ్మారి ప్రభావంతో 2020-21 ఆర్థిక ఏడాదిలో భారత వృద్ధి 9.6 క్షీణించే అవకాశం ఉందని అంచనా వేసింది ప్రపంచ బ్యాంకు. ఇది ప్రైవేటు పెట్టుబడులు, గృహ వ్యయాలలో తగ్గుదలని సూచిస్తోందని పేర్కొంది. అయితే.. 2021లో భారత్ పుంజుకొని.. 5.4 శాతం వృద్ధి సాధిస్తుందని తెలిపింది.
గ్లోబల్ ఎకనామిక్ ప్రాస్పెక్ట్స్ రిపోర్ట్ విడుదల చేసింది ప్రపంచ బ్యాంకు. భారత్లో ఐదో వంతు ఉద్యోగాలు కల్పించే అసంఘటిత రంగంలో కొవిడ్-19 కారణంగా తీవ్రం సంక్షోభం ఏర్పడినట్లు తెలిపింది.
"భారత్లో కరోనా మహమ్మారి సంక్షోభంతో ఆర్థిక వృద్ధి మందగించింది. దాని ప్రతిఫలంగా 2020-21 ఏడాదిలో వృద్ధి 9.6 శాతం క్షీణించవచ్చు. అలాగే 2021లో పుంజుకుని 5.4 శాతం వృద్ధి నమోదవుతుంది. ప్రైవేటు పెట్టుబడులు పెరగటం అందుకు దోహదపడుతుంది. అలాగే.. తయారీ, సేవా రంగంలో రికవరీ ఆర్థిక వ్యవస్థ పుంజుకుంటుందనేదానిని సూచిస్తోంది. ఆర్థిక రంగంలో నిరర్ధక రుణాలు భారీగా పెరిగిపోయాయి. "
- ప్రపంచ బ్యాంకు
పొరుగు దేశం పాకిస్థాన్లో ఆర్థిక రికవరీలో గతంలో వేసిన అంచనాలు తారుమారయ్యే అవకాశం ఉన్నట్లు తెలిపింది బ్యాంకు. 2020-21లో 0.5 శాతం వృద్ధి నమోదవొచ్చని తెలిపింది. సేవా రంగంలో బలహీనత, ఆర్థిక ఏకీకరణ ఒత్తిళ్లు వృద్ధిని అడ్డుకోవచ్చని తెలిపింది. మిగతా దక్షిణాసియా దేశాల్లో కొవిడ్ ప్రభావం కొంత మేర తగ్గినప్పటికీ.. తీవ్ర స్థాయిలోనే ఉన్నట్లు తెలిపింది. ప్రధానంగా పర్యటకం, రవాణా రంగంపై ఆధారపడిన మాల్దీవులు, నేపాల్, శ్రీలంక వంటి దేశాలు తీవ్రంగా ప్రభావితమైనట్లు వెల్లడించింది.
ఇదీ చూడండి: దేశంలో 4 ప్రాజెక్టులకు ప్రపంచ బ్యాంక్ నిధులు
