అమెరికాకు చెందిన 29 ఉత్పత్తుల దిగుమతిపై సుంకాల పెంపు గడువును మరోసారి పొడగించినట్లు ప్రభుత్వం ప్రకటించింది. ఏప్రిల్ 1న అమలు చేయాల్సిన సుంకాల పెంపు మే 2 వరకు వాయిదా వేస్తున్నట్లు ఆర్థిక మంత్రిత్వ శాఖ వెల్లడించింది.
2018 జూన్ నుంచి ఈ గడువు పొడిగించడం ఇది ఆరో సారి. ఇరు దేశాల మధ్య ద్వైపాక్షిక వాణిజ్య సంబంధాలపై చర్చలు జరుగుతున్న నేపథ్యంలో భారత్ ఇలా గడువు పొడగిస్తూ వస్తోంది.
ఈ నెల ఆరంభంలో భారత్కు అత్యంత ప్రాధాన్య హోదాను తొలగిస్తూ అమెరికా నిర్ణయం తీసుకుంది. ఫలితంగా 5.6 బిలియన్ డాలర్ల ఎగుమతులపై ప్రభావం పడనుంది.
అందుకే ఇరు దేశాలు చర్చల ద్వారా వ్యాపారపరమైన సమస్యల పరిష్కార దిశగా నిర్ణయాలు తీసుకోవాలని చూస్తున్నాయి. ప్రధానంగా ఉక్కు, అల్యూమినియం సహా పలు ఇతర ఉత్పత్తులపై ఆంక్షలు సడలించాలని అమెరికాను కోరుతోంది భారత్. ఈ నేపథ్యంలో అమెరికా నిర్ణయం వెలువడే వరకు సుంకాల పెంపు గడువును పెంచింది.
