మూడు ప్రాధాన్యాంశాల్లో ప్రజా సంక్షేమం ఒకటని ఉద్ఘాటించిన కేంద్ర ప్రభుత్వం... బడ్జెట్లో వ్యవసాయ రంగానికి ప్రోత్సాహకర రీతిలో కేటాయింపులు జరిపింది. 2022 నాటికి రైతుల ఆదాయం రెట్టింపే లక్ష్యంగా రానున్న ఆర్థిక సంవత్సరంలో వ్యవసాయం దాని అనుబంధ రంగాలపై 1, 54,775 కోట్లు ఖర్చు చేయనున్నట్లు వెల్లడించింది.
రూ. 15 లక్షల కోట్ల పరపతి
వ్యవసాయ రుణాలను 11 శాతం మేర పెంచి రూ. 15 లక్షల కోట్లను రైతులకు పరపతిగా అందించాలని సంకల్పించింది. ఇంతకుముందు ఉన్న 9 శాతం వడ్డీని 2 శాతానికి మార్చనుంది. ఎన్బీఎఫ్సీలతో సహా నాబార్డ్ రీఫైనాన్స్ పథకం ద్వారా వ్యవసాయ రుణాలు అందించాలని నిర్ణయం తీసుకుంది.
16 అంశాలతో కార్యాచరణ
వ్యవసాయానికి ప్రోత్సాహం, రైతు సంక్షేమం కోసం 16 అంశాల కార్యాచరణ ప్రణాళికను సిద్ధం చేసింది కేంద్ర సర్కారు. ప్రభుత్వ-ప్రైవేటు భాగస్వామ్యంలో కిసాన్ రైలును భారత రైల్వేల్లో ప్రవేశపెట్టనున్నట్లు తెలిపింది. ఈ రైల్లో శీతల గిడ్డంగి సౌకర్యం కల్పించి పాలు, మాంసం, చేపలు వంటి వాటిని ఆయా ప్రాంతాలకు చేర్చనుంది.
"6.11 కోట్లమంది రైతులకు వ్యవసాయ బీమా కల్పించాం. తృణధాన్యాల సాగుకు ప్రోత్సాహం కల్పించే దిశగా సూక్ష్మ వ్యవసాయాన్ని పెంచాల్సిన అవసరం ఉంది. సుస్థిర వ్యవసాయ విధానాలు, సాంకేతిక పరిజ్ఞాన వినియోగం మా ప్రణాళికలో భాగం. ఇవి సాధించేందుకు రాష్ట్రప్రభుత్వాలతో కలిసి పనిచేయాల్సి ఉంది. 16 అంశాల కార్యాచరణ ప్రణాళిక మా చిత్తశుద్ధిని తెలుపుతుంది."
-నిర్మలా సీతారామన్, కేంద్ర ఆర్థిక మంత్రి
గ్రామీణ మహిళ.. ఇక ధాన్యలక్ష్మి
స్వయం సహాయక బృందాల ద్వారా గ్రామ గిడ్డంగి పథకాన్ని అమలు చేయనుంది కేంద్రం. దీనిద్వారా మహిళలను ధాన్యలక్ష్మిగా మార్చనుంది. ఈ పథకం ద్వారా పంట అనంతర వ్యయాన్ని తగ్గించేందుకు చేయూత అందించనుంది.
రూ. లక్ష కోట్ల విలువైన చేపల ఎగుమతే లక్ష్యం
చేపల పెంపకంలో 2022-23 ఆర్థిక సంవత్సరం నాటికల్లా 200 లక్షల టన్నుల ఉత్పత్తిని సాధించేందుకు సంకల్పించింది కేంద్రం. 2024-25 కల్లా చేపల ఎగుమతిలో రూ. లక్ష కోట్ల ఆదాయాన్ని సాధించాలని లక్ష్యంగా పెట్టుకుంది. చేపల పెంపకంలో మరింత పురోగతిని సాధించేందుకు 3477మంది యువతీ, యువకులకు 'సాగరమిత్ర'లుగా ప్రోత్సాహం అందించనుంది కేంద్రం.
100 కరవు జిల్లాల్లో నిర్మాణాత్మక కార్యాచరణ
100 నీటి ఎద్దడి ఉన్న జిల్లాల్లో నిర్మాణాత్మక పథకాలు అమలు చేస్తామని బడ్జెట్ ప్రకటనలో వెల్లడించింది కేంద్రం. వారికి అవసరమైన సహకారాన్ని అందించేందుకు కృషి చేస్తామని తెలిపింది.
సౌరవిద్యుత్.. మరింత విస్తరణ
వ్యవసాయంలో సౌర విద్యుత్కు ప్రోత్సాహం కల్పించే దిశగా పీఎం-కుసుమ్ పథకాన్ని మరింత విస్తరించనుంది. 20 లక్షలమంది రైతులు సౌర విద్యుత్తో నడిచే పంపుసెట్లను ఏర్పాటు చేసుకునేందుకు అవకాశం కల్పించనుంది. మరో 15 లక్షలమంది రైతులను సౌరవిద్యుత్ గ్రిడ్కు అనుసంధానిస్తామని ప్రకటించింది.
సమతూకంలో ఎరువులు
రసాయన, సేంద్రీయ ఎరువుల వాడకంలో సమతూకాన్ని పాటించేందుకు చర్యలు తీసుకుంటామని ప్రకటించింది కేంద్రం.
వ్యవసాయంలో సాంకేతిక పరిజ్ఞాన వినియోగాన్ని పెంచి రైతుల ఆదాయాన్ని రెట్టింపు చేసే దిశగా చర్యలు తీసుకోనున్నట్లు వెల్లడించింది.
కృషి ఉడాన్ ద్వారా మార్కెటింగ్
'కృషి ఉడాన్' పథకం ద్వారా పౌరవిమానయాన శాఖ ఆధ్వర్యంలో ఈశాన్య రాష్ట్రాలు, గిరిజన జిల్లాల్లో వ్యవసాయానికి చేయూత అందించనుంది కేంద్రం. ఈ పథకం ద్వారా ఆయా ప్రాంతాల్లోని వారికి మార్కెటింగ్ సౌకర్యాలు కల్పించనుంది.
'కేంద్ర చట్టాలు అమలు చేయండి'
ఉద్యాన పంటలకు సంతృప్తకర స్థాయిలో మార్కెటింగ్ కల్పించేందుకు ఒక జిల్లాలో ఒకే ఉద్యానపంటను ప్రోత్సహిస్తామని స్పష్టం చేసింది. వ్యవసాయ రంగంలో వ్యవసాయ భూముల లీజింగ్-2016, మార్కెటింగ్ చట్టం-2017, కాంట్రాక్టు వ్యవసాయం-2018 లను ఆయా రాష్ట్రాల్లో ప్రభుత్వాలు అమలు చేయాలని సూచించింది సర్కారు.
ఇదీ చూడండి: బడ్జెట్ 2020: నిర్మల పద్దులోని హైలైట్స్
