ఈపీఎఫ్ఓ నిర్ణయం మేరకు భవిష్యనిధిపై 8.65శాతం వడ్డీరేటుకు కేంద్ర ఆర్థిక మంత్రిత్వశాఖ ఆమోదముద్ర వేసింది. దీని ద్వారా ఆరుకోట్ల మంది సంఘటిత కార్మికులకు లబ్ధి చేకూరనుంది.
విత్త మంత్రిత్వ శాఖలోని ఆర్థిక సేవల విభాగం ఈపీఎఫ్ఓ నిర్ణయించిన విధంగా 2018-19 సంవత్సరానికి 8.65శాతం వడ్డీరేటుకు ఆమోదం తెలిపిందని విశ్వసనీయ సమాచారం. కొన్ని నిబంధనలకు లోబడి వర్తించేలా ఆర్థిక సేవల విభాగం ఈ వడ్డీరేటుకు ఆమోదం తెలిపింది.
వడ్డీ రేటు పెంపు గత మూడేళ్లలో ఇదే తొలిసారి. గత ఫిబ్రవరిలో కేంద్ర కార్మిక మంత్రి సంతోష్ గ్యాంగ్వర్ నేతృత్వంలోని కేంద్ర బోర్డు ఈ మేరకు నిర్ణయం తీసుకుంది.
2017-18లో ఈ వడ్డీరేటు 8.55 శాతంగా ఉంది. గత ఐదేళ్లలో ఇదే అత్యల్పం. అంతకుముందు 2015-16లో 8.8గా ఉన్న వడ్డీరేటు 2016-17 ఆర్థిక సంవత్సరంలో 8.65కి తగ్గింది.
తాజాగా ఆర్థిక మంత్రిత్వశాఖ సమ్మతించిన అనంతరం... ఐటీ శాఖ, కార్మిక మంత్రిత్వశాఖలు సంబంధిత నోటిఫికేషన్ జారీ చేయనున్నాయి. తదనంతరం ఈపీఎఫ్ఓలో పనిచేసే 120మంది ఫీల్డ్ ఆఫీసర్లకు ఆదేశాలు జారీచేయనుంది. తద్వారా నూతన వడ్డీ సొమ్ము భాగస్వాముల ఖాతాల్లో జమ చేయనున్నారు.
ఉద్యోగుల భవిష్య నిధి సంస్థ అంచనాల ప్రకారం ఈపీఎఫ్పై 8.65శాతం వడ్డీరేటు మూలంగా 151.67 కోట్ల రూపాయలు ఆదా కానుంది.
- ఇదీ చూడండి: గౌతం గంభీర్పై కోర్టులో ఆమ్ఆద్మీ ఫిర్యాదు
