'ఐటీ రిటర్ను దాఖలుకు తుది గడువు జూన్​ 30'

ఆర్థిక వ్యవస్థను కరోనా వ్యాప్తి కుదేలు చేస్తోన్న వేళ పలు ఉద్దీపనలు ప్రకటించింది కేంద్ర ప్రభుత్వం. ఐటీ, జీఎస్టీ రిటర్నుల గడువు పెంపుతో పాటు చిన్న కంపెనీల ఊరట కోసం దివాళా స్మృతి పరిమితిని పెంచారు.

కరోనా వ్యాప్తితో దేశమంతా లాక్​డౌన్​ కారణంగా అన్ని రంగాలు ఆర్థిక సంక్షోభంలో చిక్కుకున్న నేపథ్యంలో వాటిని ఆదుకునేందుకు పలు ఉద్దీపనలు ప్రకటించింది కేంద్రం. అన్ని రంగాలను పూర్తి స్థాయిలో ఆదుకునేందుకు త్వరలోనే సమగ్ర ప్యాకేజీకి రూపుదిద్దుతున్న కేంద్ర ప్రభుత్వం తాత్కాలికంగా పలు ప్రకటనలు చేసింది.

ఈ మేరకు కేంద్ర ఆర్థిక మంత్రి నిర్మలా సీతారామన్‌ వేతన జీవులు, వ్యాపారులు, పారిశ్రామిక వర్గాలకు ఊరటనిస్తూ పలు ఉద్దీపనలు ప్రకటించారు. 2018-19 ఆర్థిక సంవత్సరానికి ఆదాయ పన్ను రిటర్ను చెల్లింపు గడువును 2020 జూన్‌ 30 వరకు పొడిగిస్తున్నట్లు ఆర్థిక మంత్రి తెలిపారు. జీఎస్టీ రిటర్నుల గడువును కూడా జూన్‌ 30వరకు పొడిగిస్తున్నట్లు వెల్లడించారు.

"2018-19 ఆర్థిక సంవత్సరానికి గాను ఆదాయ పన్ను రిటర్నులను దాఖలు చేయడానికి గడువును 2020 జూన్‌ 30 వరకు పొడిగించాం. రిటర్నుల దాఖలులో ఆలస్యం అయితే చెల్లించాల్సిన రుసుము గడువును జూన్‌ 30 వరకు పొడిగించాం. ఆలస్యంపై వడ్డీని 12 నుంచి 9శాతం తగ్గించాం. అయితే ఇది కచ్చితంగా 2018-19 ఆర్థిక సంవత్సరానికి మాత్రమే వర్తిస్తుంది. టి.డి.ఎస్‌ దాఖలు గడువును పొడిగించకుండా ఆలస్యంపై వడ్డీని 9శాతానికి తగ్గించాం."

-నిర్మలా సీతారామన్​, కేంద్ర ఆర్థిక మంత్రి

మరిన్ని ..

చిన్న కంపెనీలకు ఊరట ఇచ్చేందుకు దివాళా స్మృతి పరిమితిని లక్ష రూపాయల నుంచి కోటి రూపాయలకు పెంచుతున్నట్లు ఆర్థిక మంత్రి తెలిపారు. డెబిట్‌ కార్డు కల్గిన వారు ఏ బ్యాంకు ఏటీఎం నుంచైనా డబ్బు తీసుకోవచ్చని తెలిపారు. దానికి 3నెలల వరకు ఎలాంటి రుసుము ఉండదని వెల్లడించారు. పొదుపు ఖాతాదారులకు కనీస నిల్వ నిబంధనను ఎత్తివేస్తున్నట్లు నిర్మలా సీతారామన్‌ వెల్లడించారు.

స్టాక్ మార్కెట్లపై..

స్టాక్ మార్కెట్లలో నెలకొన్న అనిశ్చితిపై స్పందించారు సీతారామన్​ వెల్లడించారు. మార్కెట్లను రోజుకు మూడుసార్లు పరిశీలిస్తున్నట్లు తెలిపారు. రిజర్వు బ్యాంకు, ఆర్థిక శాఖ కలిసి పనిచేస్తున్నట్లు తెలిపారు. సెబీ కూడా పలు మార్గదర్శకాలను తీసుకొచ్చిందని తెలిపారు.