కరోనాపై పోరు: గ్రామీణ భారతానికి కేంద్రం నిధులు

కరోనా రెండో దశను నియంత్రించేందుకు గ్రామీణ స్థానిక సంస్థలకు నిధులు మంజూరు చేసింది కేంద్ర ప్రభుత్వం. 25 రాష్ట్రాలకు రూ. 8,923కోట్ల గ్రాంట్లను విడుదల చేసింది.

కరోనా నియంత్రణకు చర్యలు చేపట్టడంలో గ్రామీణ స్థానిక సంస్థల(ఆర్​ఎల్​బీ)కు సహాయం చేసేందుకు కేంద్ర ప్రభుత్వం రూ. 8,923కోట్లను గ్రాంట్లుగా విడుదల చేసింది. మొత్తం 25 రాష్ట్రాలకు ఈ నిధులు అందనున్నాయి. ఈ విషయాన్ని కేంద్ర ఆర్థికశాఖ వెల్లడించింది.

పంచాయతీ రాజ్​ వ్యవస్థలోని గ్రామం, మండలం​, జిల్లాలకు ఈ నిధులు అందుతాయని అధికారిక ప్రకటనలో పేర్కొంది కేంద్రం. కరోనా కట్టడి కోసం ఈ నిధులను ఉపయోగించుకోవచ్చని స్పష్టం చేసింది.

15వ ఆర్థిక కమిషన్​ సిఫార్సుల మేరకు.. ఈ గ్రాంట్లకు సంబంధించిన తొలి ఇన్​స్టాల్మెంట్​.. 2021 జూన్​లో విడుదల కావాల్సి ఉంది. అయితే దేశంలో కరోనా రెండో దశ పరిస్థితులు, పంచాయతీ రాజ్​ మంత్రిత్వశాఖ సిఫార్సుల మేరకు.. ముందుగానే నిధులను విడుదల చేయాలని కేంద్ర ఆర్థికశాఖ నిర్ణయించింది.

ఇదీ చూడండి:- కొవిడ్ కాలంలో.. చిన్న పరిశ్రమలకు చేయూత