ఆన్లైన్ వేదికగా అందించే ఆటో రిక్షా రవాణా సేవలు ఇక జీఎస్టీ(Gst on online auto rikshaw services) పరిధిలోకి రానున్నాయి. 2022 జనవరి 1 నుంచి ఈ సేవలపై 5శాతం జీఎస్టీని విధించనున్నట్లు కేంద్రం తెలిపింది. ఈ మేరకు జీఎస్టీ నుంచి ఇ-కామర్స్ ఆటో రిక్షా సేవలకు ఉన్న మినహాయింపును తొలగిస్తున్నట్లు నవంబరు 18న కేంద్ర ఆర్థిక శాఖ పరిధిలోని రెవెన్యూ శాఖ ప్రకటించింది. అయితే.. ఆఫ్లైన్లో/సాధారణంగా అందించే ఆటో రిక్షా రవాణా సేవలపై ఈ జీఎస్టీ వర్తించదని చెప్పింది.
"జీఎస్టీలో ఈ సవరణ కారణంగా.. ఆన్లైన్ ద్వారా పెద్దఎత్తున వినియోగదారులకు ఆటో సేవలు అందిస్తున్న ఇ-కామర్స్ రంగంలోని వ్యాపారులపై ప్రత్యక్ష ప్రభావం పడుతుంది. ప్రయాణికులకు రవాణా సేవలు అందించడంలో ఇ-కామర్స్ రంగం కీలక పాత్ర పోషిస్తోంది. తక్కువ ధరలో, సౌకర్యవంతమైన విధంగా రైడ్స్ బుక్ చేసుకునేందుకు అవకాశం కల్పిస్తోంది. ఈ కొత్త నిబంధన కారణంగా.. ఆన్లైన్ రైడ్స్ బుక్ చేసుకునేవారికి ధరల భారం పడుతుంది" అని ఈవై ఇండియా ట్యాక్స్ పార్ట్నర్ బిపిన్ సప్రా చెప్పారు.
ఇదీ చూడండి: శాంసంగ్ ఇండియాలో భారీగా ఉద్యోగ అవకాశాలు!
ఇదీ చూడండి: ఆసియాలో అత్యంత సంపన్నుడిగా గౌతమ్ అదానీ
