ఈ ఏడాది చివరినాటికి భారత యూజర్లందరికి పేమెంట్ సేవలు అందుబాటులోకి తీసుకురానుంది వాట్సాప్. సంస్థ అంతర్జాతీయ అధిపతి విల్ క్యాత్కర్ట్ ఈ విషయాన్ని వెల్లడించారు. భారత పర్యటనలో ఉన్న ఆయన పలు విషయాలను యూజర్లతో పంచుకున్నారు.
వాట్సాప్నకు భారత్లో 400 మిలియన్ల మంది వినియోగదారులు ఉన్నారు. దాదాపు 10 లక్షల యూజర్లపై ఏడాది కాలంగా పేమెంట్ సేవల ట్రయల్ నిర్వహిస్తోంది.
వాట్సాప్లో సందేశాలు ఎంత సులభంగా పంపగలుగుతారో అంతే సులభంగా లావాదేవీలు జరిపేలా చేయడమే కంపెనీ లక్ష్యమని క్యాత్కర్ట్ పేర్కొన్నారు.
"ఈ లక్ష్యాన్ని విజయవంతంగా అందుకోగలిగితే ఆర్థిక లావాదేవీలు భారీగా పెరుగుతాయి. భారత్లో వేగంగా వృద్ధి చెందుతున్న డిజిటల్ లావాదేవీలకు ఇది మరింత తోడ్పడుతుంది."
-విల్ క్యాత్కర్ట్, వాట్సాప్ అంతర్జాతీయ అధిపతి
పేమెంట్ దిగ్గజాలకు పోటీ
వాట్సాప్ పేమెంట్ సేవలు పూర్తిగా అందుబాటులోకి వస్తే.. ఇప్పటికే ఆ రంగంలో దూసుకెళ్తున్న పేటీఎం, ఫోన్ పే, గూగుల్ పే వంటి సంస్థలకు గట్టి పోటీ ఎదురవనుంది.
అన్ని అనుమతులు వచ్చాకే..
భారత్లో పేమెంట్ సేవలను ప్రతిష్ఠాత్మకంగా ఆవిష్కరించింది వాట్సాప్. అయితే లావాదేవీల డాటా స్టోరేజీపై వివాదాల్లో చిక్కుకుంది. ఈ కారణంగా గత ఏడాది అక్టోబర్లో భారత్లోనే లావాదేవీల స్టోరేజీ వ్యవస్థ ఏర్పాటు చేసినట్లు పేర్కొంది.
జూలైతో వాట్సాప్ పేమెంట్స్ సేవల ట్రయల్ పూర్తవుతుంది. రిజర్వు బ్యాంకు నుంచి అన్ని అనుమతులు పొందిన తర్వాతే పేమెంట్ సేవలను పూర్తి స్థాయిలో ఆవిష్కరించనున్నట్లు ఈ ఏడాది మేలో స్పష్టం చేసింది వాట్సాప్.
ఇదీ చూడండి: ఆగస్టు 1న హువావే "వై9 ప్రైమ్ 2019"
