గత ఆర్థిక సంవత్సరం (2019-20) టెలికాం సంస్థ వొడాఫోన్-ఐడియా రికార్డు స్థాయి నష్టాలను మూటగట్టుకుంది. 2019-20లో సంస్థ మొత్తం నష్టాలు రూ.73,878 కోట్లుగా ప్రకటించింది. భారతీయ కంపెనీల్లో ఇది వరకు ఏ కంపెనీ ఈ స్థాయి నష్టాలను నమోదు చేయలేదు.
2018-19 ఆర్థిక సంవత్సరంలోనూ ఈ సంస్థ రూ.14,603.9 కోట్లు నష్టాన్ని ప్రకటించింది.
టెలికామేతర ఆదాయాన్నీ.. చట్టబద్ధమైన చెల్లింపుల్లో చేర్చాలని సుప్రీం కోర్టు ఆదేశించిన నేపథ్యంలో.. సంస్థ రూ.51,400 కోట్లు చెల్లించాల్సిన పరిస్థితి ఏర్పడింది. ఇది కంపెనీలపై మరింత భారాన్ని పెంచినట్లు వొడాఫోన్-ఐడియా పేర్కొంది.
భారీ నష్టాలు..
2019-20 చివరి త్రైమాసికం (జనవరి-మార్చి)లో వొడాఫోన్-ఐడియా నికర నష్టం రూ.11,643.5 కోట్లుగా ఉంది. అంతకుముందు ఆర్థిక సంవత్సరం ఇదే సమయంలో సంస్థ నికర నష్టం రూ.4,881.9 కోట్లుగా ఉంది. గత ఆర్థిక సంవత్సరం అక్టోబర్-డిసెంబర్ త్రైమాసికంలోనూ రూ.6,438.8 కోట్ల నష్టాన్ని మూటగట్టుకుంది.
ఏజీఆర్ వివాదం..
సవరించిన స్థూల ఆదాయం (ఏజీఆర్) బకాయిలు కింద 2016-17 ఆర్థిక సంవత్సరానికిగాను వొడాఫోన్-ఐడియా రూ.58,254 కోట్లు చెల్లించాలని టెలికాం విభాగం (డాట్) లెక్కగట్టింది. అయితే దీనిపై కంపెనీ వాదన మరోలా ఉంది. తమ ఏజీఆర్ బకాయి రూ.46 వేల కోట్లేనని డాట్తో వాదిస్తోంది. ఇప్పటికే రూ.6,854.4 కోట్లు చెల్లించింది.
మెరుగైన సేవలందిస్తాం..
కంపెనీ భారీ నష్టాలు నమోదు చేసినప్పటికీ.. తమ వినియోగదారులకు మెరుగైన సేవలు అందించేందుకు తాము కృషి చేస్తున్నట్లు వొడాఫోన్-ఐడియా సీఈఓ రవీందర్ తెలిపారు. వేగవంతమైన ఇంటర్నెట్ కోసం 4జీ సామర్థ్యం పెంపు, విస్తరణ పనులు చేపట్టనున్నట్లు వెల్లడించారు. అయితే సంస్థ నిలదొక్కుకునేందుకు ప్రభుత్వం నుంచి ఉపశమనం కోసం ఎదురుచూస్తున్నట్లు తెలిపారు.
