సింగపూర్ ఆధారిత భారత ఎయిర్లైన్స్ 'విస్తారా' తన విమానాల్లో వైఫై సేవలను అందించేందుకు సిద్ధమైంది. ఫలితంగా దేశంలోనే వైఫై సేవలు అందించే మొదటి విమానయాన సంస్థగా గుర్తింపు పొందనుంది విస్తారా .
తాము అందించబోయే వైఫై సౌకర్యంతో ఫేస్బుక్, వాట్సప్తో పాటు క్రికెట్ ప్రత్యక్ష ప్రసారాలను కూడా వీక్షించవచ్చని తెలిపారు విస్తారా చీఫ్ స్ట్రేటజీ అధికారి వినోద్ కణ్నన్. అయితే ఈ సేవలకు సంబంధించి ఛార్జీలను మరికొన్ని వారాల్లో నిర్ణయిస్తామని స్పష్టం చేశారు.
సంస్థకు చెందిన ఎయిర్బస్ 321 విమానాలతో పాటు కొత్తగా కొనుగోలు చేయబోయే బోయింగ్ 787 డ్రీమ్లైనర్లలో ఈ సౌకర్యం కల్పించనుంది విస్తారా సంస్థ. కొనుగోలు చేసిన 6 డ్రీమ్ లైనర్లు ఈ నెల చివరి వరకు విస్తారాకు అందనున్నాయి. మార్చిలో వైఫై సేవలను ప్రారంభించే అవకాశం ఉంది.
పోటీని ఎదుర్కొనేందుకే..
భారత్లో ఖరీదైన విమానయాన సంస్థగా పేరొందిన విస్తారా.. బడ్జెట్ ఎయిర్లైన్స్ నుంచి గట్టి పోటీని ఎదుర్కొంటోంది. వైఫై సేవల ద్వారా పుంజుకోవచ్చని సంస్థ భావిస్తోంది.
విమానాల్లో వైఫై సౌకర్యం కల్పించాలని భారత్ 2016లో నిర్ణయించింది. అయితే భద్రతా కారణాల దృష్ట్యా ఆమోద ప్రక్రియ ఆలస్యమైంది. సమాచార శాఖతో దీర్ఘకాలిక చర్చల అనంతరం వాయిస్, డేటా, వీడియో సేవలను కల్పిస్తూ భారత టెలిగ్రాఫ్ చట్ట నిబంధనలను సవరించింది పౌర విమానయాన శాఖ.
