హైదరాబాద్ కేంద్రంగా పని చేస్తున్న విజయ డయాగ్నోస్టిక్ సెంటర్ లిమిటెడ్ ఇనీషియల్ పబ్లిక్‌ ఆఫర్‌ (Vijaya Diagnostic Centre IPO) బుధవారం (సెప్టెంబర్ 1) సబ్స్క్రిప్షన్కు అందుబాటులో వచ్చింది. సెప్టెంబర్ 3న ఐపీఓ ముగియనుంది.
ఐపీఓలో ఒక్కో షేరు ధరను (Vijaya Diagnostic Centre Share Price) రూ. 522-531గా నిర్ణ‌యించింది కంపెనీ. మొత్తం రూ.1,895.14 కోట్లు సమీకరించే లక్ష్యంతో ఈ సంస్థ ఐపీఓకు వచ్చింది. ఐపీఓ ప్రక్రియ పూర్తయిన తర్వాత.. ఈ నెల 14న మార్కెట్లో లిస్టింగ్కు వచ్చే అవకాశముంది. ఐపీఓలో వారికి కేటాయించిన కోటా కింద.. బిడ్ దాఖలు చేసిన ఉద్యోగులకు (అర్హులకు మాత్రమే) ఒక్కో ఈక్విటీ షేరుపై రూ.52 డిస్కౌంట్ లభించనుంది.
విజయ డయాగ్నోస్టిక్ గురించి..
తెలంగాణ, ఆంధ్రప్రదేశ్‌, దిల్లీ సహా 13 ప్రాంతాల్లో 80 కేంద్రాల ద్వారా ఈ సంస్థ డయాగ్నోసిస్ సేవలు అందిస్తోంది. ఐపీఓ ద్వారా ప్రమోటర్‌ డాక్టర్‌ ఎస్‌.సురేంద్రనాథ్‌ రెడ్డి, ఇన్వెస్టర్లు కారాకోరమ్‌ లిమిటెడ్, కేదారా క్యాపిటల్‌ ఆల్టర్నేటివ్‌ ఇన్వెస్ట్‌మెంట్‌ ఫండ్‌లు.. 3.56 కోట్ల షేర్లను విక్రయించాలన్నది ప్రతిపాదన. ప్రమోటరు, ఇన్వెస్టర్లు ఈ ఇష్యూ ద్వారా తమ వాటాను 35 శాతం తగ్గించుకోనున్నారు.
2020-21 ఆర్థిక సంవత్సరంలో రూ.84.91 కోట్ల లాభాన్ని ప్రకటించింది ఈ సంస్థ. అంతకుముందు ఆర్థిక సంవత్సరంలో లాభం రూ.62.5 కోట్లుగా ఉంది. ఇదే సమయంలో ఆదాయం రూ.354.18 కోట్ల నుంచి రూ.388.59 కోట్లకు పెరిగింది.
ఇదీ చదవండి: షేరు.. షేరు.. మాకెందుకు రాలేదు?
