దేశంలోని ప్రధాన టెల్కోల మధ్య తలెత్తిన రింగ్ టైం వివాదంపై టెలికాం నియంత్రణ 'ట్రాయ్' కీలక నిర్ణయం తీసుకుంది. మొబైల్ ఫోన్కు 30 సెకన్లు, ల్యాండ్లైన్కు 60 సెకన్ల ప్రామాణిక రింగ్టైంను నిర్దేశిస్తూ నిర్ణయం తీసుకుంది. కాల్ రిసీవ్ చేసుకునే వ్యక్తి.. ఫోన్కు సమాధానం ఇవ్వకున్నా.. తిరస్కరించకున్నా.. ప్రామాణిక సమయం వరకు ఫోన్ మోగాల్సిందేనని ట్రాయ్ స్పష్టం చేసింది. ఈ ప్రామాణిక రింగింగ్ సమయాలు దేశీయంగా చేసే కాల్స్కు మాత్రమే వర్తిస్తాయని ట్రాయ్ పేర్కొంది.
రింగ్టైం వివాదం ఏంటంటే..?
దేశంలోని ప్రధాన టెలికాం దిగ్గజాలైన భారతీ ఎయిర్టెల్, వొడాఫోన్ ఐడియా తమ వినియోగదారులు.. ఇతర నెట్వర్క్లకు చేసే కాల్స్పై రింగింగ్ సమయాన్ని 25 సెకన్లకు తగ్గిస్తూ ఇటీవల నిర్ణయం తీసుకున్నాయి. రిలయన్స్ జియో తమ నెట్వర్క్కు వచ్చే కాల్స్పై రింగ్టైమ్ను 25 సెకన్లకు తగ్గించడమే ఇందుకు ప్రధాన కారణమని ఈ రెండు సంస్థలు పేర్కొన్నాయి.
జియో మాత్రం తొలుత ఆయా సంస్థలే నిబంధనలు ఉల్లంగించాయని.. వాటిపై చట్టపరమైన చర్యలు తీసుకోవాలని ట్రాయ్కు ఫిర్యాదు చేశాయి.
రింగ్టైం తగ్గిస్తే లాభమెవరికి..?
రెండు వేరువేరు నెట్వర్క్ల మధ్య ఫోన్కాల్స్ మాట్లాడాలంటే కాల్ చేసిన నెట్వర్క్.. కాల్ రిసీవ్ చేసుకున్న నెట్వర్క్కు ఇంటర్‌కనెక్ట్‌ యూసేజ్‌ ఛార్జీ(ఐయూసీ) చెల్లించాల్సి ఉంటుంది. రింగింగ్ సమయాన్ని తగ్గిస్తే.. వినియోగదారుడు ఆన్సర్ చేసేలోపే కాల్ కట్ అవుతుంది. అప్పుడు వేరే నెట్వర్క్ నుంచి కాల్స్ వచ్చేలా చేసుకోవచ్చని టెలికాం సంస్థలు భావించాయి.
టెలికాం సంస్థల మధ్య తలెత్తిన ఈ వివాదానికి తెరదించేందుకు.. ట్రాయ్ ప్రామాణిక రింగింగ్ సమయాన్ని తెరపైకి తెచ్చింది.
ఇదీ చూడండి: విమానాల ఇంజిన్లు మారిస్తేనే ఇండి'గో'కు అనుమతి
