చైనాకు చెందిన ప్రముఖ షార్ట్ వీడియో యాప్లు టిక్టాక్, హలోలు భారత వ్యాపారాల నుంచి పూర్తిగా తప్పుకునేందుకు సిద్ధమయ్యాయి. ఈ విషయాన్ని టిక్టాక్, హలో యాప్ల మాతృ సంస్థ బైట్ డ్యాన్స్ ప్రకటించింది. భారత్లో తమ సంస్థలపై నిషేధం కొనసాగుతున్నందున ఈ నిర్ణయం తీసుకుంటున్నట్లు తెలిపింది.
2 వేల మంది ఉద్యోగులపై ప్రభావం..
ఈ మేరకు టిక్టాక్ ఉన్నతాధికారులు సంయుక్తంగా కంపెనీ నిర్ణయాన్ని ఈమెయిల్ ద్వారా తమ ఉద్యోగులకు తెలిపారు. కంపెనీ సిబ్బంది సంఖ్యను తగ్గించుకుంటున్నామని.. దీని ప్రభావం భారత్లో ఉన్న ఉద్యోగులందరిపైనా పడుతుందని అందులో పేర్కొన్నారు.
భారత చట్టాలకు అనుగుణంగా కార్యకలాపాలు ఉండేలా అన్ని ప్రయత్నాలు చేసినట్లు టిక్టాక్ ప్రతినిధి తెలిపారు. అయినప్పటికీ 7 నెలలుగా యాప్ పునఃప్రారంభంపై ఎలాంటి స్పష్టత రాలేదని పేర్కొన్నారు. నిషేధ సమయంలో తమకు అండగా నిలిచిన 2వేల మంది భారతీయ ఉద్యోగులకు కృతజ్ఞతలు చెప్పారు. తమ నిర్ణయం వారిని బాధించవచ్చని విచారం వ్యక్తం చేశారు.
మళ్లీ భారత్లో కార్యకలాపాలు తిరిగి ప్రారంభించేందుకు ఎదురుచూస్తున్నట్లు తెలిపారు ఉన్నతాధికారులు. అయితే అది ఎప్పుడనే విషయంపై మాత్రం అనిశ్చితి వ్యక్తం చేశారు.
నిషేధం ఎందుకు?
భారతదేశ సార్వభౌమాధికారం, సమగ్రత, భద్రతలకు హాని కలిగిస్తున్నాయి అనే ఆరోపణతో టిక్టాక్, హలో సహా 59 చైనా యాప్లపై.. 2020 జూన్ 29న కేంద్రం నిషేధం విధించింది. ఇటీవలే ఆ నిషేధాన్ని పొడగించింది. దీనితో పాటు ఆ యాప్లపై శాశ్వత నిషేధం దిశగా కేంద్రం అడుగులు వేస్తున్నట్లు వార్తలొస్తున్నాయి. ఇలాంటి పరిస్థితుల్లోనే బైట్డ్యాన్స్ భారత వ్యాపారాలను మూసేయాలని నిర్ణయించడం గమనార్హం.
