సుప్రీంకోర్టు ఆదేశాల మేరకు ప్రభుత్వానికి చెల్లించాల్సిన మొత్తం బకాయిల్లో 10శాతం.. 2021 మార్చి 31 నాటికి టెలికాం సంస్థలు చెల్లించాల్సిందేనని ప్రభుత్వ వర్గాలు స్పష్టం చేశాయి. గతంలో చేసిన మధ్యంతర చెల్లింపులకు సంబంధం లేకుండా.. మొత్తం బకాయిల్లోని 10 శాతం కట్టాలని పేర్కొన్నాయి. టెలికాం సంస్థలు మార్చి 31లోపు చెల్లించే బకాయిలు రూ.12,921 కోట్ల మేర ఉంటాయని అంచనా. ఇది ఇప్పటికే వొడాఫోన్-ఐడియా (రూ.7,854 కోట్లు), ఎయిర్టెల్ (రూ.18,004 కోట్లు) చెల్లించిన దానికి 80 శాతం మేర ఉంటుంది.
సవరించిన స్థూల ఆదాయ బకాయిలు(ఏజీఆర్) పెండింగ్‌లో ఉన్న భారతీ ఎయిర్ టెల్, వొడాఫోన్-ఐడియా సహా మిగతా ఆపరేటర్లు ఈ ఆదేశాలను పాటించాల్సిందేనని సంబంధిత వర్గాలు తేల్చి చెప్పాయి. మిగతా బకాయిలను వచ్చే ఏడాది నుంచి పదేళ్లలో వాయిదా ప్రకారం చెల్లించవచ్చని టెలికాం శాఖ తెలిపింది.
వొడాఫోన్-ఐడియా రూ.5,825 కోట్లు, భారతీ ఎయిర్ టెల్ రూ. 4,398 కోట్లు, బీఎస్ఎన్ఎల్ రూ. 583 కోట్లు, ఎంటీఎన్ఎల్ రూ.435 కోట్లు బకాయిలను 2021 మార్చి 31 నాటికి చెల్లించాల్సి ఉంది. కేవలం రిలయన్స్‌ జియో మాత్రమే పూర్తి చెల్లింపులు చేసింది. కాగా టెలికం సంస్థలన్నీ కలిపి ప్రభుత్వానికి లక్షా 47 వేల కోట్ల మేర బకాయి పడ్డాయి.
ఇదీ చూడండి:ఏజీఆర్ బకాయిలు చెల్లించండి.. కష్టాల్లో ఉన్నాం ప్లీజ్!
