స్టాక్ మార్కెట్లు నేడు రికార్డు స్థాయి లాభాలతో ముగిశాయి. వృద్ధికి ఊతమందించే దిశగా కార్పొరేట్ సుంకాలు తగ్గిస్తున్నట్లు కేంద్ర ఆర్థిక మంత్రి నిర్మలా సీతారామన్ ప్రకటించిన నేపథ్యంలో ఒక్కసారిగా కొనుగోళ్ల పర్వం మొదలైంది. వీటికి తోడు జీఎస్టీ మండలి సమావేశంలో మరిన్ని పన్నుల తగ్గింపు ఆశలు మదుపరుల సెంటిమెంట్ను బలపరిచాయి.
బొంబాయి స్టాక్ ఎక్స్చేంజి సూచీ-సెన్సెక్స్ ఏకంగా 1,921 పాయింట్లు ఎగబాకింది. చివరకు 38,014 వద్ద స్థిరపడింది. గత పదేళ్ళలో సెన్సెక్స్ ఒక్కరోజు లాభాలు ఈ స్థాయిలో ఉండటం ఇదే ప్రథమం. జాతీయ స్టాక్ ఎక్స్చేంజి సూచీ-నిఫ్టీ 570 పాయింట్లు బలపడింది. నిఫ్టీ చరిత్రలో ఒక్క రోజులో ఇన్ని పాయింట్లు పెరగటం ఇదే ప్రథమం. మార్కెట్లు ముగిసే సమయానికి నిఫ్టీ 11,274 వద్దకు చేరింది.
ఇంట్రాడే సాగిందిలా
సెన్సెక్స్ 38,378 పాయింట్ల గరిష్ఠాన్ని తాకగా.. 36,086 పాయింట్ల కనిష్ఠాన్ని నమోదు చేసింది.
నిఫ్టీ నేడు 11,382 పాయింట్ల అత్యధిక స్థాయి.. 10,691 పాయింట్ల అత్యల్ప స్థాయిల మధ్య కదలాడింది.
లాభనష్టాల్లోనివి ఇవే..
హీరో మోటార్స్ 12.52 శాతం, మారుతీ 10.89 శాతం, ఇండస్ఇండ్ బ్యాంక్ 10.74 శాతం, బజాజ్ ఫినాన్స్ 10.19 శాతం, ఎస్బీఐ 10.09 శాతం, ఎం&ఎం 9.53 శాతం లాభాలను నమోదు చేశాయి.
పవర్ గ్రిడ్ 2.39 శాతం, ఇన్ఫోసిస్ 1.94 శాతం, టీసీఎస్ 1.74 శాతం, ఎన్టీపీసీ 1.52 శాతం, టెక్ మహీంద్రా 0.35 శాతం నష్టాలతో ముగిశాయి.
రూపాయి, ముడి చమురు
రూపాయి నేడు 29 పైసలు బలపడింది. డాలర్తో పోలిస్తే 71.04 వద్దకు చేరింది.
ముడి చమురు ధరల సూచీ-బ్రెంట్ 0.64 శాతం పెరిగింది. అంతర్జాతీయ మార్కెట్లో బ్యారెల్ ముడి చమురు ధర 64.84కు చేరింది.
ఆసియాలో ఇతర ప్రధాన మార్కెట్లయిన షాంఘై సూచీ, జపాన్ సూచీ, దక్షిణ కొరియా సూచీలు లాభాలతో ముగిశాయి. హాంకాంగ్ సూచీ నష్టాలతో ముగిసింది.
ఇదీ చూడండి: కార్పొరేట్ పన్ను తగ్గింపు చారిత్రక నిర్ణయం: మోదీ
