టెల్కోలు ఏజీఆర్ బకాయిలు రూ.1.47 లక్షల కోట్లు చెల్లించే విషయంలో టెలికాం శాఖ (డీఓటీ) నిర్ణయాన్ని వెనక్కు తీసుకుంది. టెల్కోలపై బలవంతపు చర్యలు తీసుకోరాదనే ఆదేశాలను ఇవాళ ఉపసంహరించుకుందని విశ్వసనీయ వర్గాలు తెలిపాయి.
టెలికాం సంస్థలు, ఇతరులు ఏజీఆర్ బకాయిలు చెల్లించకపోయినా వారిని బలవంతపెట్టవద్దని డీఓటీ డెస్క్ అధికారి... ఆటార్నీ జనరల్, ఇతర రాజ్యాంగ అధికారులకు లేఖ రాశారు. దీనిపై సుప్రీంకోర్టు ఆగ్రహం వ్యక్తం చేసిన నేపథ్యంలో తాజా నిర్ణయం తీసుకుంది డీఓటీ.
సుప్రీం ఆగ్రహం..
తమ తీర్పుపై డీఓటీ డెస్క్ స్టే విధించడాన్ని ఉదయం తప్పుబట్టింది న్యాయస్థానం. బకాయిల విషయంలో టెల్కోలు కోర్టు తీర్పును ఖాతరు చేయకుండా గడువులోపు టెలికాం విభాగానికి చెల్లించకపోవటాన్ని తీవ్రంగా పరిగణించింది.
దీన్ని కోర్టు ధిక్కరణగా ఎందుకు పరిగణించకూడదో తెలిపాలని.. భారతీ ఎయిర్టెల్, వొడాఫోన్-ఐడియా, టాటా టెలీ సర్వీసెస్కు సమన్లు జారీ చేసింది. "ఈ దేశంలో న్యాయం ఉందా? ఇలాంటివి చూస్తూ ఇక్కడ ఉండటం కన్నా దేశం విడిచిపోవటం మంచిది" అని వ్యాఖ్యానించింది సుప్రీం.
జనవరి 23 వరకే గడువు
టెలికాం విభాగానికి ఏజీఆర్ బకాయిలను 2020 జనవరి 23లోపు టెల్కోలు చెల్లించాల్సిందేనని గతంలో సుప్రీంకోర్టు తీర్పునిచ్చింది.
కంపెనీల వారీగా బాకాయిలు ఇలా..
- ఎయిర్టెల్ రూ.21,682.13 కోట్లు
- వొడాఫోన్-ఐడియా రూ.19,823.71 కోట్లు
- ఆర్కాం రూ.16,456.47 కోట్లు
- బీఎస్ఎన్ఎల్ రూ.2,098.72 కోట్లు
- ఎంటీఎన్ఎల్ రూ.2,537.48 కోట్లు
ఇదీ చూడండి: దేశంలో న్యాయముందా?: టెల్కోలపై సుప్రీం తీవ్ర వ్యాఖ్యలు
