ప్రభుత్వం నుంచి ఎలాంటి మూలధన సాయం కోసం తాము ఎదురుచూడట్లేదని స్పష్టం చేసింది స్టేట్ బ్యాంక్ ఆఫ్ ఇండియా. ఈ ఆర్థిక సంవత్సరానికి సంబంధించి కేంద్రం నుంచి అదనపు నిధులు అవసరం లేదని పేర్కొంది. తమ వద్ద సరిపడా మూలధనం ఉందని చెప్పారు ఎస్బీఐ మేనేజింగ్ డైరెక్టర్ అర్జిత్ బసు.
ప్రస్తుత ఆర్థిక సంవత్సరానికి గానూ.. ప్రభుత్వ రంగ బ్యాంకులకు రూ.70 వేల కోట్ల అదనపు మూలధన నిధులను విడుదల చేయనున్నట్లు గత శుక్రవారం ప్రకటించారు కేంద్ర ఆర్థిక మంత్రి నిర్మలా సీతారామన్. ఈ నేపథ్యంలో ఎస్బీఐ ఈ ప్రకటన చేయడం గమనార్హం.
టైర్-1, టైర్-2 బాండ్లకు ప్రణాళికలను కూడా ప్రకటించేశామన్న బసు.. మూలధనం పెంచుకునేందుకు నాన్ కోర్ ఆస్తుల్ని విక్రయించే ప్రయత్నాల్లో ఉన్నట్లు తెలిపారు. ఈ మూలధన సాయం ఆర్థిక ఇబ్బందుల్లో ఉన్న ఇతర బ్యాంకులకు అందిస్తే బాగుంటుందని అభిప్రాయపడ్డారు.
