ఈ ఏడాది రెండో త్రైమాసికంలో (ఏప్రిల్-జూన్) తమ సంస్థ ఆపరేటింగ్ లాభం 23 శాతం పెరగొచ్చని ఎలక్ట్రానిక్ ఉపకరణాల దిగ్గజం శాంసంగ్ ప్రకటించింది. పర్సనల్ కంప్యూటర్లలో వాడే చిప్ సెట్లకు డిమాండ్ భారీగా పెరగటం ఇందుకు కారణంగా చెప్పుకొచ్చింది. గత త్రైమాసికానికి సంబంధించి పూర్తి స్థాయి ఫలితాలను ఈ నెలాఖరున ప్రకటించనుంది శాంసంగ్.
కరోనా కారణంగా ప్రపంచవ్యాప్తంగా భారీ మార్పులు చోటు చేసుకున్నాయి. చాలా కంపెనీలు తమ ఉద్యోగులకు వర్క్ ఫ్రం హోం వంటివి ఇవ్వడం, విద్యార్థులు ఆన్లైన్ క్లాస్లు వింటుండటం వంటివి జరుగుతున్నాయి. ఈ నేపథ్యంలో కంప్యూటర్లు, ల్యాప్టాప్లకు డిమాండ్ విపరీతంగా పెరిగింది. ఈ అవకాశాలను శాంసంగ్ సరిగ్గా అందిపుచ్చుకున్నట్లు విశ్లేషకులు చెబుతున్నారు.
ఏప్రిల్-జూన్ త్రైమాసిక అంచనాలు ఇలా..
ఈ ఏడాది ఏప్రిల్ జూన్ మధ్య ఆపరేటింగ్ లాభం 6.8 బిలియన్ డాలర్లుగా ఉంటుందని అంచనా వేస్తోంది శాంసంగ్. అయితే ఆదాయం మాత్రం 7 శాతం తగ్గి.. 43.6 బిలియన్ డాలర్లుగా నమోదు కావచ్చని తెలిపింది.
ఇదే సంవత్సరం తొలి త్రైమాసికంలో ఆపరేటింగ్ ప్రాఫిట్లో 3.4 శాతం వృద్ధి నమోదు చేసింది శాంసంగ్. టీవీలు, స్మార్ట్ఫోన్లు, సహా ఇతర ఉత్పత్తుల విక్రయాలు భారీగా పడిపోవడం కారణంగా రెండో త్రైమాసికంలో లాభాలు భారీగా తగ్గుతాయని అంచనా వేయడం గమనార్హం.
ఇదీ చూడండి:ఆర్డరిస్తే ఇంటికే మాంసం డెలివరీ.. ఈ-స్టార్టప్‌లకు పెరిగిన గిరాకీ
