డిజిటల్ ఇండియా కల సాకారంలో తన వంతు పాత్ర పోషించేలా మరిన్ని కీలక ప్రణాళికలు సిద్ధం చేసింది రిలయన్స్ ఇండస్ట్రీస్. కరోనా కారణంగా తొలిసారి వీడియో కాన్ఫరెన్సింగ్ ద్వారా నిర్వహించిన 43వ వార్షిక సర్వ సభ్య సమావేశం (ఏజీఎం)లో ఆయా వివరాలను వాటాదారులకు వివరించారు సంస్థ అధిపతి ముకేశ్ అంబానీ. కరోనా సంక్షోభం సవాళ్లతో పాటు అవకాశాలనూ తెచ్చిందని, వాటిని అందిపుచ్చకునేలా రిలయన్స్ ముందుకు సాగుతుందని స్పష్టం చేశారు.
జియోలో గూగుల్ పెట్టుబడులు, గ్లాస్ పేరిట సరికొత్త సాంకేతికత అభివృద్ధి, 5జీ సేవలు అందుబాటులోకి తీసుకురావడంపై కీలక విషయాలు వెల్లడించారు ముకేశ్. ఆ వివరాలు సంక్షిప్తంగా....
పెట్టుబడులు..
జియోలో 7.7 శాతం వాటా కొనుగోలుకు సెర్చ్ ఇంజన్ దిగ్గజం గూగుల్ సిద్ధమైంది. ఇందుకోసం రూ.33,737 కోట్లు పెట్టుబడి పెట్టనుంది.
గూగుల్తో ఒప్పందంతో కలిపి ఇప్పటి వరకు జియో ప్లాట్ఫామ్స్కు వచ్చిన పెట్టుబడుల విలువ రూ.1,52,055.45 కోట్లు.
జియోలో ఇప్పటి వరకు విక్రయించిన వాటా 32.84 శాతం.
మూడు నెలల కన్నా తక్కువ సమయంలో జియోలో వాటా విక్రయం, రైట్స్ ఇష్యూ (రూ.53,124 కోట్లు), పెట్రో కెమికల్ వ్యాపారాల్లో బ్రిటీష్ పెట్రోలియం పెట్టుబడి (రూ.7,629 కోట్లు) ద్వారా రిలయన్స్ ఇండస్ట్రీస్ మొత్తం రూ.2,12,809 కోట్లు సమీకరించుకుంది.
గూగుల్తో ఒప్పందంతో పెట్టుబడుల సమీకరణ ప్రక్రియ సమాప్తం.
అప్పులు లేని అతిపెద్ద సంస్థ..
జియో పెట్టుబడులు, రైట్స్ ఇష్యూ, చమురు వ్యాపారాల వాటా విక్రయం ద్వారా సమీకరించుకున్న నిధులతో రిలయన్స్ ఇండస్ట్రీస్ అప్పులు లేని సంస్థగా మారింది.
సంస్థ అప్పులు 2019-20 చివరి నాటికి రూ.1,61,035 కోట్లుగా ఉన్నాయి. రిలయన్స్ సమీకరించుకున్న నిధులు అంతకన్నా చాలా ఎక్కువగా ఉండటం గమనార్హం.
అప్పులు లేని సంస్థగా మారడం వల్ల టెలికాం, రిటైల్, చమురు వ్యాపారాలు వేగంగా వృద్ధి చెందేందుకు వీలు ఏర్పడినట్లు ముకేశ్ అంబానీ తెలుపారు.
గత ఏడాది రిలయన్స్ వ్యాపారాల్లో 20 శాతం వాటాను అతిపెద్ద చమురు సంస్థ సౌదీ ఆరామ్కోకు విక్రయించాలని భావించింది రిలయన్స్. అయితే ఇటీవల భారీగా పతనమైన చమురు ధరలు, కరోనా సంక్షోభం వల్ల ఒప్పందం ఆలస్యమైంది. ఈ ఒప్పందంపై ఇంకా చర్చలు జరుగుతున్నట్లు ముకేశ్ వెల్లడించారు.
రిటైల్ వ్యాపారాలు..
రిలయన్స్ రిటైల్ స్టోర్లు మూడింట రెండొతులు టైర్2, టైర్3 పట్టణాల్లోనే ఉన్నట్లు ముకేశ్ అంబానీ తెలిపారు. రిటైల్ స్టోర్లలో విక్రయించే కూరగాయలు 80 శాతం వరకు రైతుల వద్దే నేరుగా కొంటున్నట్లు వెల్లడించారు.
లక్ష మంది చిరువ్యాపారులతో అనుబంధమే తమ అభివృద్ధి వ్యూహమని ముకేశ్ అన్నారు.
5జీ సేవలు వచ్చే ఏడాది..
దేశీయంగా 5జీ సేవలు అందించేందుకు టెక్నాలజీని సొంతంగా రూపొందిస్తోంది జియో.
5జీ స్పెక్ట్రమ్ అందుబాటులోకి రాగానే.. ట్రయల్ నిర్వహించనుంది.
వచ్చే ఏడాది ఎప్పుడైనా జియో 5జీ సేవలు అందుబాటులోకి రావచ్చు.
ప్రధాన మంత్రి నరేంద్ర మోదీ.. 'ఆత్మ నిర్భర్ భారత్' పిలుపులో భాగంగా 5జీ సాంకేతికతను అభివృద్ధి చేస్తోంది జియో.
దేశంలో డేడా వినియోగం భారీగా పెరిగింది. గత నెలలోనే 500 కోట్ల జీబీ డేటాను వాడిన జియో వినియోగదారులు.
జియో బ్రాడ్ బ్యాండ్ ద్వారా 10 లక్షల ఇళ్లకుపైగా కనెక్షన్లు ఇచ్చామని ముకేశ్ అంబానీ తెలిపారు.
జియో టీవీ+, జియో గ్లాస్, జియో మీట్
ఓటీటీ సేవల సంస్థలు నెట్ఫ్లిక్స్, అమెజాన్ ప్రైమ్ వీడియో, హాట్స్టార్ వంటి వాటి సేవలు జియో టీవీ+లో ఓకే దగ్గర అందుబాటులోకి రానున్నాయి. వాయిస్ సెర్చ్ ద్వారా ఈ యాప్ను ఆపరేట్ చేసే సదుపాయం ఉంది.
జూమ్కు పోటీగా తీసుకువచ్చిన జియో మీట్ వీడియో కాన్ఫరెన్సింగ్ యాప్కు భారీ స్పందన వస్తోంది. ఇప్పటికే ఈ యాప్ను 50 లక్షల మందికి పైగా డౌన్లోడ్ చేసుకున్నారు.
ఈ సారి కొత్తగా జియోగ్లాస్‌ను ఆవిష్కరించింది జియో. ఈ స్మార్ట్‌ కళ్లద్దాల బరువు కేవలం 75 గ్రాములు మాత్రమే. దీనిలో 25 రకాల యాప్స్‌ అందుబాటులో ఉంటాయి. ఇది మిక్స్‌డ్ వర్చువల్ రియాలటీ సేవలను అందిస్తుంది. దీనికి కేబుల్ కూడా కనెక్ట్‌ చేసుకోవచ్చు.
ఈ కొత్త ఆవిష్కరణల విశేషాలను ముకేశ్ అంబానీ పెద్ద కుమారుడు ఆకాశ్ అంబానీ వివరించారు.
జియో మార్ట్
జియో మార్ట్ సేవలు దేశవ్యాప్తంగా 200 పట్టణాల్లో అందుబాటులోకి వచ్చాయి. రోజుకు 2.5 లక్షల ఆర్డర్లు డెలవరీ చేస్తోంది జియో మార్ట్.
మరిన్ని..
- డెన్ నెట్వర్క్, హాత్వే కేబుల్... నెట్వర్క్ 18లో విలీనమయ్యాయి. దీనికి నియంత్రణపరమైన అనుమతులు లభించాల్సి ఉంది.
- మూలధన సమీకరణ ప్రణాళికలు పూర్తయ్యాయి. ఇకపై వ్యూహాత్మక భాగస్వామ్యంపై దృష్టి పెట్టనున్నట్లు ముకేశ్ అంబానీ తెలిపారు.
- గూగుల్తో కలిసి 5జీ, 4జీ ఫోన్లను అందుబాటులోకి తీసుకురానుంది జియో.
- రిలయన్స్ ఇండస్ట్రీస్ నుంచి పెట్రో కెమికల్ వ్యాపారాన్ని అనుబంధ సంస్థగా మార్చేదుకు ప్రయత్నిస్తోంది. దీనిపై నియంత్రణ సమస్యలను అధిగమించేందుకు ఎన్సీఎల్ఏటీని సంప్రదించనుంది సంస్థ.
ఇవీ చూడండి:
'వాట్సాప్, జియోమార్ట్ కలయికతో విప్లవాత్మక మార్పులు'
