ప్రపంచవ్యాప్తంగా విజృంభిస్తున్న కరోనా ప్రభావం ప్రముఖ క్యాబ్ సర్వీస్ సంస్థ ఓలా పైనా పడింది. వైరస్ కారణంగా విధించిన లాక్డౌన్ వల్ల గడిచిన రెండు నెలల్లో 95 శాతం నష్టాలు చవిచూసినట్లు ఆ సంస్థ ప్రకటించింది. ఈ క్రమంలోనే ఓలా రైడ్స్, ఆర్థిక సేవలు, ఫుడ్ డెలివరీ రంగాల నుంచి 1,400 మంది సిబ్బందిని తొలగిస్తున్నట్లు సంస్థ సీఈఓ భావిష్ అగర్వాల్ బుధవారం తెలిపారు. తొలగింపునకు కారణాలను వివరిస్తూ.. ఇ-మెయిల్ ద్వారా ఉద్యోగులకు సమాచారం అందించారు.
ఈ వైరస్ మా పరిశ్రమపై తీవ్ర ప్రభావం చూపింది. గత 2 నెలల్లో మా ఆదాయం 95శాతం తగ్గిపోయింది. ముఖ్యంగా, దేశంలోని లక్షలాది మంది డ్రైవర్లు, వారి కుటుంబాల జీవనోపాధి కష్టతరంగా మారింది.
-భావిష్ అగర్వాల్, ఓలా సంస్థ సీఈఓ
లాక్డౌన్ ప్రకటించినప్పటి నుంచి చాలా కంపెనీలు తమ ఉద్యోగులను వర్క్ ఫ్రం హోంకు పరిమితం చేశాయని తెలిపారు అగర్వాల్. విమాన ప్రయాణాలు నిలిపివేసి, విహార యాత్రలకు అనుమతించకోవడం వల్ల నెలకొన్న సంక్షోభం.. తమ సంస్థపై దీర్ఘకాలిక ప్రభావం చూపనున్నట్లు తెలిపారు.
చిరుకానుకలతో ఊరట...
ప్రభావిత ఉద్యోగులకు నోటీసులతో సంబంధం లేకుండా 3 నెలల ఆర్థిక భృతిని అందించనున్నట్లు అగర్వాల్ తెలిపారు. సంస్థలో ఎక్కువకాలం పనిచేసిన ఉద్యోగులకు అధిక మొత్తంలో చెల్లించనున్నట్లు పేర్కొన్నారు. ఈ ఏడాది డిసెంబరు 31 వరకు వైద్య, ప్రమాద, జీవిత బీమా సదుపాయాలను కల్పిస్తామని అగర్వాల్ వివరించారు. ప్రతి ఉద్యోగి తల్లిదండ్రులకు వైద్య బీమా అందించాలని కంపెనీ నిర్ణయించినట్లు స్పష్టం చేశారు.
గతవారంలో ప్రముఖ ఫుడ్ డెలివరీ సంస్థలైన ఉబర్, జోమాటో, స్వీగ్గీలు ఉద్యోగులను తొలగిస్తున్నట్లు ప్రకటించాయి.
