ప్రస్తుత ఆర్థిక సంవత్సరం మొదటి ఐదు నెలల్లో దేశీయ లాజిస్టిక్స్ రంగంలో సుమారు 1.49 లక్షల ఉద్యోగాలు పెరిగే అవకాశముందని ఓ నివేదిక అంచనా వేసింది. టీమ్ లీస్ సర్వీసెస్ అనే సంస్థ ఈ నివేదికను రూపొందించింది.
2019-20 (ఏప్రిల్-సెప్టెంబర్) నాటికి లాజిస్టిక్స్ రంగంలో ఉద్యోగకల్పన 3 శాతం(1.49 లక్షల ఉద్యోగాలు) పెరగొచ్చని ఈ సర్వే పేర్కొంది. 19 రంగాల్లో... భారత్లోని 775 ఎంటర్ప్రైజెస్, ప్రపంచ వ్యాప్తంగా 85 వ్యాపారాలపై జరిగిన సర్వే ఆధారంగా ఉద్యోగ కల్పన ముఖ చిత్రాన్ని రూపొందించింది.
"2018-19 రెండవ అర్థ భాగం నాటి గణాంకాల ప్రకారం దేశంలో ప్రస్తుతం లాజిస్టిక్స్ రంగంలో 82.4 లక్షల ఉద్యోగాలున్నాయి. టైర్-2, టైర్-3 పట్టణాల్లో ఈ-కామర్స్ కంపెనీల విస్తరణ వల్లే ఈ రంగంలో నైపుణ్యం ఉన్నవారికి ఉద్యోగ అవకాశాలు పెరిగాయి." --- సుదీప్ సేన్, టీమ్ లీస్, ఇండస్ట్రీయల్ విభాగ అధిపతి.
నివేదికలోని మరిన్ని విశేషాలు...
ఉద్యోగ కల్పన పెరిగిన అనంతరం లాజిస్టిక్స్ రంగంలో... 31,480 నూతన ఉద్యోగాలతో ముంబయి తొలి స్థానంలో ఉండనుంది. 28,510 ఉద్యోగాలతో దిల్లీ రెండో స్థానంలో నిలువనుంది.
ఉద్యోగ కల్పనలో టైర్-2 పట్టణాల్లో అత్యధికంగా 5 శాతం వృద్ధి ఉండనుంది. టైర్-3 పట్టణాల్లో 2 శాతం వృద్ధి నమోదుకావచ్చు.
ఇదీ చూడండి: ఆర్బీఐ డిప్యూటీ గవర్నర్ ఆచార్య రాజీనామా
