'వాట్సాప్ సందేశాల మూలాన్ని గుర్తించే వీలుండాలి'

నెట్టింట చక్కర్లు కొడుతున్న వాట్సాప్​ సందేశాన్ని మొదట ఎవరు పంపారో గుర్తించే వెసులుబాటు ఉండాల్సిందేనని పునరుద్ఘాటించారు ఐటీ, కమ్యూనికేషన్స్​ శాఖ మంత్రి రవిశంకర్​ ప్రసాద్. తప్పుడు వార్తలు, వదంతుల వ్యాప్తిని అరికట్టేందుకు ఇది తప్పనిసరని వివరించారు.

సామాజిక మాధ్యమాల సందేశాల ఎన్​క్రిప్షన్ విధానాన్ని భారత్ స్వాగతిస్తుందన్నారు కేంద్ర న్యాయ, ఐటీ, కమ్యూనికేషన్స్​ శాఖ మంత్రి రవిశంకర్ ప్రసాద్. కానీ తప్పుడు సందేశాల వ్యాప్తి నియంత్రణకోసం వాటి మూలాలను గుర్తించేందుకు భద్రతా సంస్థలకు అనుమతి తప్పనిసరిగా ఉండాలని స్పష్టం చేశారు. దిల్లీలో నేడు ప్రారంభమైన 'ఇండియా మొబైల్ కాంగ్రెస్'​ సదస్సులో ఈ విషయాన్ని తెలిపారు.

"ఎన్​క్రిప్షన్​కు అభ్యంతరం లేదు. ప్రజలను ఆందోళనకు గురి చేసే వదంతుల సందేశం ఒకే ప్రాంతం, ఒకే అంశం, పదే పదే వ్యాప్తి చెందుతోంది. వాటి మూలాన్ని గుర్తించి తప్పుడు వార్తల వ్యాప్తిని అరికట్టే వీలు భద్రతా సంస్థలకు ఉండాలి. "
-రవిశంకర్ ప్రసాద్​, ఐటీ, కమ్యూనికేషన్స్​ శాఖ మంత్రి

ప్రపంచంలో అత్యధిక డేటాను భారత్ వినియోగిస్తోందని గుర్తు చేశారు రవిశంకర్​. డేటా ఎనలిటిక్స్​, డేటా క్లీనింగ్​, డేటా రిఫైనింగ్​కు భారత్ కేంద్రం కావాలని ఆకాంక్షించారు. అంతర్జాలం స్థిరంగా, రక్షణగా, భద్రంగా ఉండాలన్నారు రవిశంకర్​.

కుదరని ఏకాభిప్రాయం

సందేశాల మూలాన్ని గుర్తించే అంశంపై ప్రభుత్వానికి, వాట్సాప్ సంస్థకు మధ్య ఏకాభిప్రాయం కదరటం లేదు.

సందేశం మూలం తెలిస్తే వినియోగదారుల సమాచార గోప్యత విధానాన్ని ఉల్లంఘించినట్లేనని వాట్సాప్​ వాదిస్తోంది. ఇందుకు ప్రత్యామ్నాయ మార్గాలను ఆలోచించాలని గత నెలలో రవిశంకర్​తో భేటీలో ఫేస్​బుక్​ గ్లోబల్​ ఎక్జిక్యూటివ్​ నిక్​ క్లెగ్ సూచించినట్లు అధికారిక వర్గాలు తెలిపాయి.

ఇతరులకు పంపే సందేశాలను ఎవరూ తెలుసుకునే వీలు లేకుండా ఎండ్​-టు-ఎండ్ ఎన్​క్రిప్షన్​ సాంకేతికతను ఉపయోగిస్తోంది వాట్సాప్.

ఇదీ చూడండి: 6 పైసల కోసం టెలికాం దిగ్గజాల మధ్య మీమ్స్​ వార్​