కరోనా వైరస్ విజృంభిస్తున్న తరుణంలో దేశవ్యాప్తంగా లాక్డౌన్ కొనసాగుతోంది. ఆ ప్రభావం దేశంలోని కంపెనీలపై పడింది. ఈ నేపథ్యంలో ఆయా సంస్థలు ఆర్థిక భారం తగ్గించుకునేందుకు వేతనాలకు కోత విధించడం, ఉద్యోగులను తగ్గించుకోవడం వంటి చర్యలకు దిగాయి. ఇలాంటి పరిస్థితుల్లో కేరళకు చెందిన బాబీ చెమ్మనూర్ గ్రూప్ మాత్రం తమ ఉద్యోగులకు బంపర్ ఆఫర్ ఇచ్చింది. తమ ఉద్యోగులందరికీ వేతనాలు పెంచుతున్నట్లు తెలిపింది.
ఈ సంస్థకు జువెలరీ, ఫినాన్స్, రిసార్ట్లు, టూర్స్, ట్రావెల్స్ సహా పలు వ్యాపారాలు ఉన్నాయి. ముందుగా నగల వ్యాపారాల్లో పని చేస్తున్న ఉద్యోగులకు 25 శాతం వేతనం పెంచుతున్నట్లు ప్రకటించింది. ఇతర వ్యాపారాల్లోని ఉద్యోగులకూ దశల వారీగా వేతనాల పెంపు ఉంటుందని తెలిపింది.
5 లక్షల మందికి లబ్ధి..
తమ సంస్థ అభివృద్ధి కోసం క్రియాశీలకంగా కృషి చేసిన 5లక్షల మంది ఉద్యోగుల పట్ల తాము ఎంతో గర్వంగా ఉన్నట్లు బాబీ చెమ్మనూరు గ్రూప్ ఉద్ఘాటించింది.
వారి భాగస్వామ్యంతోనే..
మైక్రో ఫినాన్స్ విభాగంలో 70,000 మంది మహిళా ఉద్యోగులు ఉన్నట్లు ఆ సంస్థ హెచ్ఆర్ అధిపతి రాజన్ మీనన్ తెలిపారు. ఈ విభాగం సంయుక్త భాగస్వామ్యంతో నడుస్తోందని.. దీని ద్వారా వచ్చే ప్రతిఫలాలు ఉద్యోగులకూ అందుతాయని పేర్కొన్నారు.
ఇప్పటికే తమ ఉద్యోగులకు చాలా మందికి ఇంటి నుంచే పని చేసే వెసులుబాటు కలిపించినట్లు పేర్కొన్నారు మీనన్. దాన్ని ఇంకొన్నాళ్లు పొడగించినట్లు వెల్లడించారు.
