టెలికాం రంగంలో జియో ఓ విప్లవం సృష్టించింది. వినియోగదారులకు అతి తక్కువ ధరకు అపరిమిత కాలింగ్ సేవలు తెచ్చి.. దేశం మొత్తానికి అంతర్జాలాన్ని మరింత చేరువ చేసింది. జియో ఇచ్చిన ఉత్సాహంతో మరో సంచలనానికి నాంది పలకనుంది రిలయన్స్. బ్రాడ్బ్యాండ్, డీటీహెచ్ రంగాన్ని సరికొత్త పుంతలు తొక్కించనుంది.
42వ వార్షిక సర్వసభ్య సమావేశంలో జియో గిగా ఫైబర్ను ఆవిష్కరించింది రిలయన్స్ ఇండస్ట్రీస్. జియో గిగాఫైబర్ 4కె సెట్ టాప్ బాక్స్ ఫీచర్లను ముఖేశ్ అంబానీ కుమారుడు ఆకాశ్ అంబానీ, కుమార్తె ఈషా అంబానీలు వివరించారు.
మిక్స్డ్ రియాలిటీ...
వర్చువల్ రియాలిటీ, ఆగ్‌మెంటెడ్ రియాలిటీలను కలిపి మిక్స్డ్ రియాలిటీ పేరుతో కొత్త సాంకేతికతను అభివృద్ధి చేసింది జియో. దీని ద్వారా వినియోగదారులు షాపింగ్‌కు వెళ్లకుండా.. ఇంట్లోనే ఉండి దుస్తులను ట్రై చేయవచ్చు. తమకు నచ్చిన దుస్తులను వర్చువల్ రియాలిటీలో చూసుకుని అనంతరం వాటిని ఆన్‌లైన్‌లో ఆర్డర్ చేయవచ్చు. విద్య, వినోద రంగాల్లో ఈ పద్ధతిని ఉపయోగించుకోవచ్చు. మనకు ఎప్పటికీ ఓ రహస్యంగా తోచే అంతరిక్షం వంటి సంక్లిష్ట అంశాలపైనా మిక్స్డ్ రియాలటీ సాయంతో సులువుగా అవగాహన పెంచుకోవచ్చు.
టీవీలో వీడియో కాల్స్...
ఈ సెట్ టాప్ బాక్సు ద్వారా వినియోగదారులు ప్రపంచంలో ఎక్కడ ఉన్నా, ఎవరికైనా ఉచితంగా వీడియో కాల్స్ చేసుకోవచ్చు. ఇందుకోసం 'జియో కాల్' పేరిట ఓ యాప్‌ను అందిస్తున్నారు. టీవీకి యూఎస్బీ కెమెరా అనుసంధానం చేసి అవతలవారికి మొబైల్‌, ల్యాప్‌ట్యాప్ ఉన్నా సరే వీడియో కాన్ఫరెన్స్‌లో టీవీ ద్వారా మాట్లాడవచ్చు.
వీడియో గేమ్స్...
జియో సెట్టాప్ బాక్స్‌లో వాయిస్‌సెర్చ్తో పాటు గేమింగ్ సౌకర్యాలు కల్పించారు. సెట్టాప్ బాక్స్‌ను టీవీకి అనుసంధానించి, దేశంలోని ఏ ప్రాంతంలో ఉన్నవారితోనైనా సరే వర్చువల్ ఆన్లైన్ గేమ్స్ ఆడుకోవచ్చు. ఇందుకోసం అనేక సంస్థలతో ఒప్పందం చేసుకుంది రిలయన్స్.
ఏం వేగం...!
జియో 4కె సెట్టాప్ బాక్సు ఫీచర్లను వివరించడానికి ముందు ఆకాశ్, ఈషా అంబానీలు జియో బ్రాడ్బ్యాండ్ స్పీడ్‌ను టెస్ట్ చేశారు. అందరినీ ఆశ్చర్యానికి గురి చేస్తూ 1జీబీపీఎస్ వరకు స్పీడ్ నమోదు కావడం విశేషం.
