నిబంధనలకు లోబడి జెట్ఎయిర్వేస్ పునరుద్ధరణకు సహకరిస్తామని డైరెక్టర్ జనరల్ ఆఫ్ సివిల్ ఏవియేషన్ (డీజీసీఏ) తెలిపింది. అందుకు బలమైన, నమ్మకమైన పునరుద్ధరణ ప్రణాళిక కోరనున్నట్లు తెలిపింది.
నియంత్రణ చట్రానికి లోబడి అవసరమైన సాయం చేసేందుకు సిద్ధంగా ఉన్నట్లు డీజీసీఏ సీనియర్ అధికారి తెలిపారు.
ఆర్థిక సంక్షోభంలో కూరుకుపోయిన జెట్ ఎయిర్వేస్ గత అర్థరాత్రి నుంచి కార్యకలాపాలు నిలిపివేసిన నేపథ్యంలో డీజీసీఏ ఈ ప్రకటన చేసింది.
జెట్ కార్యకలాపాలు నిలిచిపోయిన అనంతరం నెలకొన్న పరిస్థితులపై దేశంలోని పలు విమానాశ్రయ నిర్వాహకులతో పౌర విమానయాన కార్యదర్శి ప్రదీప్ సింగ్ ఖరోలా సమావేశమయ్యారు. ఈ భేటీకి ఎయిర్పోర్ట్స్ అథారిటీ ఆఫ్ ఇండియా (ఏఏఐ) అధికారులు హాజరయ్యారు.
జెట్ సంస్థ సేవలు నిలిపేసిన కారణంగా విమాన ఛార్జీలు పెరగకుండా ఉండటం సహా ఇతర అంశాలపై చర్చించేందుకు... విమానయాన సంస్థల ప్రతినిధులతోనూ సమావేశం కానున్నారు.
దాదాపు రూ.8,000 కోట్ల అప్పుల్లో చిక్కుకున్న జెట్లోని వాటా విక్రయానికి రుణదాతలు ప్రయత్నాలు ముమ్మరం చేశారు.
