స్మార్ట్​ ఫోన్లలో 'నావిక్​' ఫీచర్​.. షియోమీతో ఇస్రో ఒప్పందం!

ఈ ఏడాది రెండో అర్ధభాగంలో భారత్​ సొంత సాంకేతికతతో పని చేసే నావిగేషన్​ వ్యవస్థ 'నావిక్​'.. స్మార్ట్​ఫోన్లలో అందుబాటులోకి తీసుకురానుంది. ఇందుకోసం షియోమీతో ఇస్రో ఒప్పందం చేసుకునేందుకు చర్చలు జరుపుతోంది. షియోమీ-ఇస్రో చర్చలు దాదాపు పూర్తయినట్లు అధికారిక వర్గాల సమాచారం.

స్మార్ట్​ఫోన్​ యూజర్లకు.. 'నావిక్​' సేవలు అందుబాటులోకి తెచ్చేందుకు భారత అంతరిక్ష పరిశోధన సంస్థ (ఇస్రో) ప్రయత్నాలు ముమ్మరం చేసింది. గ్లోబల్​ పొజీషనింగ్​ సిస్టమ్ (జీపీఎస్​)కు ప్రత్యామ్నాయంగా భారత్ సొంత పరిజ్ఞానంతో తీసుకువచ్చిన నావిగేషన్​ సాంకేతికతే ఈ 'నావిక్​'.

షియోమీతో చర్చలు..

'నావిక్​'ను స్మార్ట్​ఫోన్లలో అందుబాటులోకి తెచ్చేందుకు గానూ.. ప్రముఖ స్మార్ట్​ఫోన్ల తయారీ సంస్థ షియోమీతో ఇస్రో చర్చలు జరుపుతున్నట్లు అధికార వర్గాల సమాచారం. భారత్​లో విక్రయించే షియోమీ స్మార్ట్​ఫోన్లలో.. 'నావిక్​'ను సపోర్ట్​ చేసే.. చిప్​సెట్​ను వినియోగించే విషయంపై చర్చలు జరుగుతున్నాయని పేర్కొన్నాయి.

భవిష్యత్​ స్మార్ట్​ఫోన్లకు నావిక్​తో పని చేసే 'క్వాల్​కామ్' చిప్​సెట్లను తయారు చేస్తోంది షియోమీ. ఈ చిప్​సెట్లను త్వరలోనే విడుదల చేసే అవకాశముంది.

ఆరు నెలల్లో విడుదల..

నావిక్​ సాంకేతికకు సంబంధంచి షియోమీతో చర్చలు సాఫీగా జరుగుతున్నాయని 'ఇస్రో' అధికారి ఒకరు వెల్లడించారు. చర్చలు చివరి దశకు చేరినట్లు తెలిపారు. మరో 6 నెలల్లో 'నావిక్​' సపోర్ట్​తో పని చేసే స్మార్ట్​ఫోన్లను షియోమీ విడుదల చేసే అవకాశముందని పేర్కొన్నారు. ఎక్కువ మందికి నావిక్ సేవలను అందించేందుకు వీలుగా.. మధ్య తరహా స్మార్ట్​ఫోన్లపై ప్రస్తుతం దృష్టి సారించినట్లు తెలిపారు.

నావిక్​ ప్రత్యేకతలు

నావిక్​ అమల్లోకి వస్తే.. భారత యూజర్లకు లొకేషన్​ సమాచారాన్ని కచ్చితత్వంగా ఇవ్వనుంది. నావిక్ పరిధి దేశ సరిహద్దు దాటిన తర్వాత 1,500 కిలోమీటర్ల మేర విస్తరించి ఉంది. నావిక్​ ఇప్పటికే 3 జీపీపీ ధ్రువీకరణ పొందింది.

ఇదీ చూడండి:వరుస రాకెట్ దాడులతో పెట్రోల్​ ధరలకు రెక్కలు