ఇంటర్నెట్ వినియోగించుకోవాలంటే ఆంగ్ల భాషలో వెబ్సైట్ అడ్రస్ టైప్ చేయటం మాత్రమే మనకు తెలుసు. మాతృభాష ఒక్కటే తెలిసినవారికి ఇది కొంత ఇబ్బందే. ఇలాంటివారికి తీపి కబురందించింది యూనివర్సల్ ఆక్సెప్టెన్స్ స్టీరింగ్ గ్రూప్ (యుఏఎస్జీ). తెలుగు, తమిళం సహా తొమ్మిది భారతీయ భాషల్లో జూన్ నుంచి వెబ్సైట్ పేర్ల నమోదు ప్రక్రియ అందుబాటులోకి రానుందని ప్రకటించింది.
ప్రస్తుతం ఇంగ్లీష్తో పాటు మాండరిన్, అరబిక్, రష్యన్, దేవనాగరి భాషల్లో ఈ సేవలు అందుబాటులో ఉన్నాయి.
హిందీకి సంబంధించి ఎక్స్టెన్షన్ పదంగా ".భారత్(డాట్ భారత్)" అందుబాటులో ఉంది. ఈ పదం అనుసంధానంతో దేవనాగరి భాషల్లో వెబ్సైట్ను అంతర్జాలంలో నమోదు చేసుకోవచ్చు.
వచ్చే జూన్ నుంచి తెలుగు, తమిళం, గుజరాతీ, బెంగాలీ, గుర్ముఖీ, కన్నడ, మళయాళం, ఒడియా భాషల్లోనూ ఈ సదుపాయం అందుబాటులోకి రానుంది.
లేబుల్ జెనరేషన్ రూల్స్(ఎల్జీఆర్)పై తుది నిర్ణయం తీసుకున్న తర్వాత ఈ 9 భారత ప్రాంతీయ భాషలను ఐసీఏఎన్ఎన్(ఇంటర్నెట్ కార్పొరేషన్ ఫర్ అసైన్డ్ నేమ్స్ అండ్ నంబర్స్) రూట్ సర్వర్లకు అనుసంధానం చేయనున్నారు.
"కేవలం ప్రాంతీయ భాషల్లోనే అంతర్జాలాన్ని వినియోగించుకోగల వందకోట్ల మంది భారతీయులకు ఈ సేవలు ఎంతగానో తోడ్పడతాయి. సమాచార భద్రత, స్థానికీకరణ సమస్యలను చాలా వరకు తీరుస్తాయి. మరో బిలియన్ మంది ఆంగ్లేతర భాష మాట్లాడేవారిని ఆన్లైన్కు తీసుకొచ్చేందుకు భారత ప్రభుత్వంతో కలిసి పనిచేస్తాం. వివిధ సంస్థలు, సాఫ్ట్వేర్ డెవలపర్లు, ఇంటర్నెట్ సంస్థలూ స్థానిక భాషల్లోనూ ఈ-మెయిల్స్ అంగీకరించేలా, ప్రపంచవ్యాప్తంగా వారి వ్యవస్థల్లో మార్పులు తీసుకొచ్చేలా పనిచేస్తాం."
- అజయ్ డేటా, యుఏఎస్జీ ఛైర్మన్
ఇదీ చూడండి :పాక్ సైనికులను మట్టుబెట్టిన భారత జవాన్లు
