కరోనా ప్రభావం ఉన్నప్పటికీ దేశంలోని రెండో అతిపెద్ద ఐటీ సేవల సంస్థ ఇన్ఫోసిస్ తన జోరు చూపించింది. జూన్తో ముగిసిన మొదటి త్రైమాసికంలో రూ. 4,272 కోట్ల నికర లాభాన్ని నమోదు చేసింది. గతేడాది ఇదే సమయంతో(రూ.3,802 కోట్లు) పోలిస్తే నికర లాభం 12.4 శాతం పెరిగినట్లు సంస్థ వెల్లడించింది.
"తొలి త్రైమాసికంలో మా ప్రదర్శన, భారీ ఒప్పందాల వల్ల మిగిలిన ఆర్థిక సంవత్సరంలో సంస్థ పనితీరు మెరుగుపడుతుందనే మా విశ్వాసం పెరుగుతోంది."
-సలీల్ పరేఖ్, ఇన్ఫోసిస్ సీఈఓ
క్యూ1లో ఆదాయం 8.5 శాతం పెరిగి రూ.23,665కి చేరినట్లు ఇన్ఫోసిస్ ప్రకటించింది. గతేడాది ఇదే సమయంలో రూ. 21,803 కోట్ల ఆదాయాన్ని గడించినట్లు తెలిపింది. ఆదాయాలు 1.5 శాతం పెరిగినట్లు తెలిపింది.
2020-21 ఆర్థిక సంవత్సరంలో స్థిర కరెన్సీ వద్ద సంస్థ ఆదాయం రెండు శాతం మేర పెరిగే అవకాశం ఉందని ఇన్ఫోసిస్ అంచనా వేసింది.
ఇదీ చదవండి- మహారాష్ట్రలో మరో 7,975 కేసులు.. 233 మరణాలు
