Work from home: కరోనా మహమ్మారి కారణంగా వర్క్ ఫ్రమ్ హోమ్కు ప్రాధాన్యం పెరిగింది. చాలా సంస్థలు ఉద్యోగులకు ఈ అవకాశం కల్పించాయి. అయితే, ప్రస్తుతం కరోనా ఉద్ధృతి తగ్గుముఖం పట్టింది. దీంతో దేశంలోని దిగ్గజ ఐటీ కంపెనీలు ఉద్యోగులను ఆఫీసులకు తీసుకొచ్చే కార్యాచరణలో నిమగ్నమయ్యాయి. టాటా కన్సల్టెన్సీ సర్వీసెస్(టీసీఎస్), విప్రో, కాగ్నిజెంట్, ఇన్ఫోసిస్ వంటి సంస్థలు ఆఫీసులకు వచ్చేందుకు సిద్ధంగా ఉండాలని ఉద్యోగులను ఆదేశించాయి. అందుకు తగిన ఏర్పాట్లు చేపడుతున్నాయి. వచ్చే నెల నుంచే అమలు చేసే అవకాశం ఉన్నట్లు తెలుస్తోంది.
కరోనాతో ఏర్పడిన పరిస్థితుల వల్ల గత రెండేళ్లుగా ఇంటి నుంచే పని చేస్తున్నారు ఉద్యోగులు. ప్రస్తుతం ఆఫీసులో పని అంటే ఉద్యోగులతో పాటు సంస్థలకు పెద్ద మార్పుగానే చెప్పొచ్చు. చాలా సంస్థలు ఇప్పుడు అనువైన, హైబ్రిడ్ వర్క్ మోడల్ను అనుసరిస్తున్నాయి.
మార్చి 3 నుంచి..
బెంగళూరు కేంద్రంగా పనిచేసే ఐటీ దిగ్గజం విప్రో.. తమ సంస్థలో పనిచేసే మేనేజర్లు, ఆ పైస్థాయి ఉద్యోగులు 2022, మార్చి 3 నుంచి ఆఫీసులకు వచ్చేయాలని ఆదేశాలు జారీ చేసింది. అయితే, వారానికి రెండు రోజులు మాత్రమే కార్యాలయానికి వచ్చేందుకు వెసులుబాటు కల్పించింది. మరో సంస్థ కాగ్నిజెంట్.. ఏప్రిల్ నుంచి అమలు చేసేందుకు సిద్ధమైంది. అయితే, ఉద్యోగులే వర్క్ఫ్రమ్ హోమ్ లేదా ఆఫీసుకు రావటంపై నిర్ణయం తీసుకునేందుకు అవకాశం ఇచ్చింది.
మరోవైపు.. ఇన్ఫోసిస్ 2022లో హైబ్రిడ్ వర్క్ మోడల్ను అనుసరించేందుకు సిద్ధమైనప్పటికీ.. పెద్ద సంఖ్యలో ఉద్యోగులను కార్యాలయాలకు రప్పించేందుకు మరో 3 నుంచి 4 నెలలు సమయం పడుతుందని సంస్థ ప్రతినిధులు తెలిపారు.
"మార్చి 3 నుంచి పూర్తిస్థాయిలో వ్యాక్సిన్ తీసుకున్న మేనేజర్లు, ఆ పైస్థాయి ఉద్యోగులు వారానికి రెండురోజులు సోమవారం, గురువారాల్లో కార్యాలయానికి వచ్చేందుకు అవకాశం కల్పిస్తున్నాం. మిగతా ఉద్యోగులకు వర్క్ ఫ్రమ్ హోమ్ పొడిగించాలని నిర్ణయించాం."
- విప్రో ప్రతినిధి.
ఇదీ చూడండి: మీ జీతం రూ.15 వేల పైన ఉందా? ఈపీఎఫ్ఓ కొత్త స్కీం..!
