జర్మనీ రాజధాని బెర్లిన్లో జరుగుతున్న 'ఐఎఫ్ఏ కన్జ్యూమర్ ఎలక్ట్రానిక్స్ ప్రదర్శన'లో సరికొత్త ఆవిష్కరణలు తళుక్కున మెరిశాయి. ఈ కార్యక్రమంలో భాగంగా దాదాపు 1800 సంస్థలు వాటి ఉత్పత్తులను ప్రదర్శిస్తున్నాయి. వీటిని చూసేందుకు రోజుకు సుమారు 2.4 లక్షల మంది ప్రజలు వస్తున్నారు.
చైనా కిరిన్-990 స్మార్ట్ ఫోన్...
చైనా కమ్యూనికేషన్ దిగ్గజం హువావే.. అతి తక్కువ ధరకు లభించే కొత్త రకం స్మార్ట్ ఫోన్ను ప్రదర్శనలో ఉంచింది. 5జీ నెట్వర్క్కు సపోర్ట్ చేసే కిరిన్-990 హువావే మేట్ 30 అనే మొబైల్ ఫోన్.. ఇతర వాటితో పోల్చితే వేగం, బ్యాటరీ సామర్థ్యం ఎక్కువగా ఉంటుందని సంస్థ ప్రతినిధులు తెలిపారు. ఇందులో హైసిలికాన్ చిప్సెట్ ఉంటుంది. 10 బిలియన్ల ట్రాన్సిస్టర్లు ఉంటాయి. మునిచ్లో సెప్టెంబర్ 19న ఈ ఫోన్ను మార్కెట్లోకి విడుదల చేయనున్నట్లు అధికారులు తెలిపారు.
లెనోవో సరికొత్త ఫోన్...
చైనీస్ ఎలక్ట్రానిక్ సంస్థ లెనోవో సరికొత్త మోటోరోలా స్మార్ట్ ఫోన్ను ఆవిష్కరించింది. ప్రధానంగా సరికొత్త కెమెరా ఫీచర్స్తో తీసుకొస్తున్న ఈ ఫోన్లో క్వాడ్ కెమెరా సిస్టమ్ ఉంటుంది. 48 మెగా పిక్సెల్ కెమెరాలో జూమ్ చేసుకునే వీలుతో వైడ్ యాంగిల్ లెన్స్ ఉన్నాయి. రెండు రోజుల పాటు వచ్చే 4000 ఎమ్ఏహెచ్ బ్యాటరీ, 4జీబీ ర్యామ్, 128 జీబీ ఇంటర్నల్ స్టోరేజ్ ఉంటుంది. సెప్టెంబర్ 5నే ఈ మొబైల్ను ప్రపంచ మార్కెట్లోకి విడుదల చేసింది లెనోవో. వీటి ధర సుమారు 30 వేల పైనే ఉంది.
మద్యం నాణ్యతను గుర్తించే పరికరం...
ఫ్రాన్స్కు చెందిన మైఓనో సంస్థ కొత్త వైన్ స్కానర్ను రూపొందించింది. మీరు రుచి చూస్తున్న మద్యం నాణ్యత, పరిమాణం, రుచి వంటి వాటిని విశ్లేషించి వందకు ఎన్ని మార్కులు ఇవ్వచ్చో చెబుతుంది. మద్యంపై మీకు సూచనలూ చేస్తుంది. ఈ స్కానర్ను మందు గ్లాస్లో ఉంచుతే దానిపై విశ్లేషణలు జరిపి సమాచారాన్ని బ్లూటూత్ ద్వారా మీ ఫోన్కు చేరవేస్తుంది.
జంతు ప్రేమికులకు రోబో పిల్లి...
బెర్లిన్ ఐఎఫ్ఏ ఎలక్ట్రానికి ప్రదర్శనలో జపాన్కు చెందిన యుకాయ్ ఇంజినీరింగ్ సంస్థ తీసుకొచ్చిన కొత్తరకం 'రోబో క్యాట్' ప్రత్యేక ఆకర్షణగా నిలిచింది. అంకుర పరిశ్రమల ఉత్పత్తులకు మాత్రమే అనుమతించే 'షోటాపర్స్' ఈ రోబోను ప్రదర్శనకు ఉంచారు. ఈ పిల్లి రోబోను తట్టితే తోకను ఊపుతుంది. ఎంత గట్టిగా కొడితే అంత వేగంగా ఊపుతూ నిజమైన జంతువును పట్టుకున్న అనుభూతిని కలిగిస్తుంది. జంతువులను పెంచుకోలేని పరిస్థితుల్లో ఉన్న వారికి ఇది ఎంతో ఉపయోగకరంగా ఉంటుందని సంస్థ ప్రతినిధులు తెలిపారు.
ఈ కార్యక్రమంలో సరికొత్త మొబైల్ పౌచ్లతో పాటు మనకు మూత్రం వచ్చే సమయాన్ని గుర్తించే డీ ఫ్రీ అనే పరికరాలు ప్రదర్శనలో ఉన్నాయి.
" మేము టోక్యోకు చెందినవాళ్లం. అక్కడి ప్రజలు చిన్నచిన్న అపార్ట్మెంట్లలో నివసిస్తుంటారు. జంతువులను పెంచుకునే వీలుండదు. అందుకు ప్రత్యామ్నాయంగానే ఈ రోబో పిల్లిని ఆవిష్కరించాం."
-శున్సుకే వోకి, యుకాయ్ ఇంజినీరింగ్ వ్యవస్థాపకుడు.
