ప్రముఖ ఆరోగ్య ఉత్పత్తుల తయారీ సంస్థ జాన్సన్ & జాన్సన్.. కరోనా నియంత్రణకై వ్యాక్సిన్ ప్రయోగానికి సిద్ధమైనట్లు ప్రకటించింది. ఈ ఏడాది సెప్టెంబరు నాటికి మానవునిపై పరీక్షలు నిర్వహిస్తామని, వచ్చే ఏడాది ప్రారంభంలో అత్యవసర వినియోగానికి సిద్ధంగా ఉంటుందని తెలిపింది.
ఈ ప్రయత్నంలో భాగంగా 1 బిలియన్ డాలర్ల పెట్టుబడి పెట్టేందుకు.. అమెరికా ప్రభుత్వ బయోమెడికల్ అడ్వాన్స్ రీసెర్చ్ అండ్ డెవలప్మెంట్ అథారిటీతో ఈ కంపెనీ ఒప్పందం కుదుర్చుకుంది. జనవరిలోనే కరోనాకు టీకా కనుగొనేందుకు జాన్సన్ సంస్థ పనులు ప్రారంభించింది. ఎబోలా వైరస్ కోసం వ్యాక్సిన్ను అభివృద్ధి చేసేందుకు ఉపయోగించిన సాంకేతిక పరిజ్ఞానాన్నే ఇందుకు ఉపయోగిస్తోంది.
ప్రయోగంలో ఉత్తమ ఫలితం కోసం అనేక జంతవులపై పరీక్షలు నిర్వహించాం. జనవరి 15 నుంచి ఇప్పటివరకు 12 వారాలు పట్టింది. ఓ వైపు ఈ వ్యాక్సిన్ ఎలా పని చేస్తుందో నిర్ధరించుకోవాలి. మరో వైపు ఎక్కువగా పని చేయాలి.
-పాల్ స్టాఫెల్స్, జాన్సన్ అండ్ జాన్సన్ ప్రధాన పరిశోధనాధికారి
ఇప్పటి వరకు కరోనా సంబంధిత వ్యాధులకు ఎలాంటి వ్యాక్సిన్లు కనుగొనలేనప్పటికీ.. ఈ సమస్యను తాము అధిగమించగలమని స్టోఫెల్స్ ధీమా వ్యక్తం చేశారు. ప్రపంచవ్యాప్తంగా 100 కోట్ల వ్యాక్సిన్లను సరఫరా చేసేందుకు.. అమెరికా సహా, ఇతర దేశాలలో తమ ఉత్పత్తి సామర్థ్యాన్ని విస్తరించనున్నట్లు తెలిపారు.
