కృత్రిమ మేధ సహాయక సేవల్లో ఈ ఏడాది కీలక అప్డేట్లు తీసుకురానున్నట్లు టెక్ దిగ్గజం గూగుల్ ప్రకటించింది
కొత్త అప్డేట్లో గూగుల్ అసిస్టెంట్ సహాయంతో అద్దెకు కార్లు, సినిమా టికెట్లు ఆటోమాటిక్గా బుక్ చేయడం వంటి ఫీచర్లు అందుబాటులోకి తీసుకురానున్నట్లు అమెరికాలోని మౌంటెన్ వ్యూలో జరిగిన డెవలపర్స్ వార్షిక సదస్సులో గూగుల్ సీఈఓ సుందర్ పిచాయ్ వెల్లడించారు.
గూగుల్ మ్యాప్లో ఇన్కాగ్నిటో
యాక్టివిటీ హిస్టరీ రికార్డు కాకుండా 'ఇన్కాగ్నిటో' సదుపాయాన్ని గూగుల్ మ్యాప్లోనూ ప్రవేశపెట్టనున్నట్లు సుందర్ పిచాయ్ పేర్కొన్నారు. హిస్టరీ రికార్డులు నిల్వ ఉండకూడదనుకుంటే ఆటోమేటిక్గా తొలగించే ఫీచర్ను అందుబాటులోకి తీసుకురానున్నట్లు తెలిపారు.
ముందే కమాండ్ ఇవ్వడం ద్వారా నిర్ణీత సమయం వరకే గూగుల్ మ్యాప్ హిస్టరీని సేవ్ చేసే సదుపాయం కల్పించనున్నట్లు వివరించారు సుందర్.
ప్రాజెక్ట్ యూఫోనియా
స్పష్టంగా మాట్లాడలేని వారి మాటలను అర్థం చేసుకునే సాంకేతికతను రూపొందించే దిశగా తమ నిపుణులు పరిశోధనలు చేస్తున్నట్లు గూగుల్ పేర్కొంది. తద్వారా అలాంటి వారి అవసరాలను అర్థం చేసుకుని, సేవలు అందించే వీలు కలుగుతుందని గూగుల్ తెలిపింది.
ఈ అప్డేట్లన్నీ ఈ ఏడాది చివరినాటికి అందుబాటులోకి రానున్నట్లు గూగుల్ ప్రకటించింది.
పిక్సల్ శ్రేణిలో మరో రెండు కొత్త ఫోన్లు
గూగుల్ పిక్సల్ స్మార్ట్ ఫోన్ల శ్రేణిలో మరో రెండు కొత్త ఫోన్లు ఆవిష్కరించింది గూగుల్. పిక్సల్ 3ఏ, పిక్సల్ 3ఏ ఎక్స్ఎల్ మోడళ్లు విడుదల చేసింది.
భారత విపణిలో వీటి ధర రూ.39,999 నుంచి రూ.44,999 మధ్య ఉండనున్నట్లు గూగుల్ తెలిపింది. మే 15 నుంచి ఈ ఫోన్లు అందుబాటులోకి రానున్నట్లు పేర్కొంది.
| ఫీచర్లు | పిక్సల్ 3ఏ | పిక్సల్ 3ఏ ఎక్స్ఎల్ |
| తెర | 5.6 అంగుళాలు | 6 అంగుళాలు |
| ర్యామ్/స్టోరేజి | 4జీబీ/64జీబీ | 4జీబీ/64జీబీ |
| కెమెరా | 12.2/8 మెగా పిక్సల్ | 12.2/8 మెగా పిక్సల్ |
| బ్యాటరీ | 3,000 ఎంఏహెచ్ | 3,700 ఎంఏహెచ్ |
