Google FB Secret Deal: గూగుల్, ఫేస్బుక్కు కొత్త చిక్కులు వచ్చిపడ్డాయి. ఆన్లైన్ యాడ్ సేల్స్ విషయంలో ఆ రెండు సంస్థలు కుమ్మక్కు అయ్యాయని ఆరోపిస్తూ అమెరికా కోర్టులో ఓ వ్యాజ్యం దాఖలైంది. గూగుల్ సీఈఓ సుందర్ పిచాయ్, ఫేస్బుక్ అధినేత మార్క్ జుకర్బర్గ్కు ఈ రహస్య ఒప్పందం గురించి తెలుసని, వారి ఆమోదంతోనే ఇదంతా జరిగిందన్నది అందులోని ప్రధాన ఆరోపణ.
టెక్సాస్ అటార్నీ జనరల్ కెన్ పాక్స్టన్ నేతృత్వంలో అనేక రాష్ట్రాల అటార్నీ జనరళ్లు కలిసి 2021 డిసెంబర్లో ఈ లా సూట్ దాఖలు చేశారు. రెండు దిగ్గజ సంస్థలు ఇలా ఒప్పందం చేసుకోవడం పోటీతత్వ స్ఫూర్తికి విరుద్ధమని అందులో పేర్కొన్నారు. 2018 సెప్టెంబర్లో గూగుల్-ఫేస్బుక్ మధ్య ఈ ఒప్పందం జరిగిందంటూ.. అందుకు సంబంధించిన అనేక వివరాలను పొందుపరిచారు. ముఖ్యంగా.. ఫేస్బుక్ చీఫ్ ఆపరేటింగ్ ఆఫీస్ షెరిల్ సాండ్బర్గ్కు, ఆమె సంస్థలోని కీలక వ్యక్తులకు మధ్య జరిగిన ఈమెయిల్ సంభాషణలోని కీలకాంశాలను ప్రస్తావించారు. ఒప్పందం ఖరారు అయ్యాక.. తుది ఆమోదం కోసం జుకర్బర్గ్కు కూడా మెయిల్ పంపినట్లు వివరించారు.
తోసిపుచ్చిన గూగుల్, ఫేస్బుక్
ఈ ఆరోపణలపై గూగుల్ స్పందించింది. వ్యాజ్యంలో ఉన్న అంశాలన్నీ అసత్యాలని, న్యాయపరంగా విచారణ అర్హత లేదని స్పష్టం చేసింది. ఈ డీల్కు సుందర్ ఆమోదం ఉందన్న వాదనల్ని గూగుల్ అధికార ప్రతినిధి పీటర్ షోటెన్ఫెల్స్ తోసిపుచ్చారు. ఏటా వందలాది ఒప్పందాలు చేసుకుంటామని, ప్రతిదానికీ సీఈఓ ఆమోదం అవసరం ఉండదని చెప్పారు.
గూగుల్తో ఒప్పందంలో కొత్తదనం ఏమీ లేదని మెటా(ఒకప్పటి ఫేస్బుక్) సంస్థ అధికార ప్రతినిధి తెలిపారు. యాడ్ ప్లేస్మెంట్స్ కోసం ఇతర సంస్థలతో చేసుకునే ఒప్పందాల లాంటిదేనని స్పష్టం చేశారు.
