చాట్బాట్.. ప్రతి వెబ్సైట్ తన సందర్శకులతో సంభాషించేందుకు ఉపయోగించే టూల్. ఇంటర్నెట్లో వేర్వేరు అవసరాల కోసం అనేక చాట్బాట్స్ అందుబాటులో ఉన్నాయి. రోజురోజుకు వీటిలో ఎన్నో మార్పులు జరుగుతున్నాయి. కృత్రిమ మేధ రాకతో చాట్బాట్లను మరింత అభివృద్ధి చేస్తున్నాయి వెబ్సైట్లు.
గూగుల్ చాట్బాట్
కొన్ని రోజులుగా ప్రత్యేకమైన చాట్బాట్ రూపొందించే పనిలో ఉంది దిగ్గజ సంస్థ గూగుల్. తను తీసుకురాబోయే చాట్బాట్ ప్రపంచంలోనే అత్యుత్తమం అని చెబుతోంది. ప్రపంచంలో ఏ విషయం గురించి అడిగినా సమాధానం ఇస్తోందని పేర్కొంది గూగుల్.
గూగుల్ తీసుకురాబోయే ఈ మోస్ట్ అడ్వాన్స్డ్ చాట్బాట్ పేరు 'మీనా'. ఈ చాట్బాట్లో సంభాషణకు సంబంధించిన న్యూరల్ నెట్వర్క్లో 2600 కోట్ల పారామీటర్స్ ఉన్నాయని గూగుల్ వెల్లడించింది. ఫలితంగా మిగతా చాట్బాట్స్ కన్నా వినియోగదారుడితో మీనా చక్కగా సంభాషిస్తుందని తెలిపింది.
మీనా ఎలా పనిచేస్తుంది?
మీనాకు సీక్వెన్స్ టూ సీక్వెన్స్ మోడల్లో శిక్షణ ఇచ్చేందుకు 341 జీబీ టెక్స్ట్ డేటాతో పాటు 4,000 కోట్ల పదాలను ఉపయోగించింది. ఈ మోడల్ ద్వారా పేరాలో పదాల మధ్య తేడాను గుర్తించి మీనా అర్థం చేసుకోగలుగుతుంది.
మీనాలో ఒక ఎవాల్వ్డ్ ట్రాన్స్ఫార్మర్ ఎన్కోడర్తోపాటు 13 డీకోడర్లను ప్రోగ్రామ్ చేసింది గూగుల్. మనం ఇచ్చే సమాచారాన్ని ఎన్కోడర్ అర్థం చేసుకుని డీకోడర్ల ద్వారా తిరిగి మనతో మాట్లాడుతుంది.
మనిషికి దగ్గరగా...
చాట్బాట్స్కు గూగుల్ కొత్తేమీ కాదు. 2015లోనే సాంకేతిక సహాయత కోసం ఓ మోడల్ను విడుదల చేశారు. అంతేకాకుండా సంభాషణను అర్థం చేసుకునేలా అనేక భాషల మోడళ్లను గూగుల్ రూపొందించింది.
మానవుడిలా కాకపోయినా.. ఆ స్థాయిలో స్పందించేలా మీనాను రూపొందించింది. ప్రపంచంలో ఏ విషయంపైనైనా తను మాట్లాడగలదు.
అయితే బాహ్య ప్రపంచానికి మీనాను అందుబాటులోకి తీసుకురాలేదు గూగుల్. భవిష్యత్తులో రావచ్చేమో మరి!
ఇదీ చూడండి: 'బ్రాండ్' మనదే.. పేరు మాత్రమే విదేశీ!
