కరోనా వ్యాప్తిని అరికట్టడంలో భాగంగా చాలా దేశాలు లాక్డౌన్లో ఉన్నాయి. ఈ నేపథ్యంలో వీడియో కాన్ఫరెన్సింగ్ యాప్లకు డిమాండ్ విపరీతంగా పెరిగిపోయింది. లాక్డౌన్ ముందు పెద్దగా పరిచయం లేని 'జూమ్' వంటి యాప్లు ఇప్పుడు ట్రెండింగ్లో కొనసాగుతున్నాయి. అయితే జూమ్ యాప్పై ఇటీవల పలు అనుమానాలు వ్యక్తమయ్యాయి. కేంద్రం కూడా అధికారిక అవసరాలకు 'జూమ్' యాప్ను వినియోగించొద్దని సూచించింది.
ఇదే అదునుగా.. డిమాండ్ను దృష్టిలో పెట్టుకొని జూమ్ యాప్కు పోటీగా వీడియో కాన్ఫరెన్సింగ్ కోసం మెసెంజర్ రూమ్స్ ఫీచర్ను ఆవిష్కరించింది సామాజిక మాధ్యమ దిగ్గజం ఫేస్బుక్. ఇందులో ఒకే సారి 50 మంది వీడియో కాన్ఫరెన్స్లో పాల్గొనే వీలుందని తెలిపింది. జూమ్ యాప్లో ఈ పరిమితి 100 మందికి ఉండటం గమనార్హం.
మెసెంజర్ రూమ్స్ సదుపాయాలు..
జూమ్ యాప్లో ఉన్నట్లుగానే మెసెంజర్ రూమ్స్లో సరికొత్త ఫీచర్లు ఉంటాయని ఫేస్బుక్ తెలిపింది. 14 రకాల కెమెరా ఫిల్టర్లు ఉంటాయని పేర్కొంది. అమెరికాలో రానున్న వారాల్లో మెసెంజర్ రూమ్స్ను అందుబాటులోకి తేనున్నట్లు వెల్లడించింది. ప్రస్తుతం మెసెంజర్, వాట్సాప్ల ద్వారా రోజుకు 700 మిలియన్ల మంది కాల్స్ చేసుకుంటున్నట్లు పేర్కొంది.
ఖాతాలేకున్నా...
ఖాతా లేని వారూ మెసెంజర్ రూమ్స్ కాన్ఫరెన్స్లో పాల్గొనేందుకు వీలు కల్పించున్నట్లు తెలిపింది ఫేస్బుక్. ఇందుకోసం కాన్ఫరెన్స్ లింక్ను గ్రూపులు, పేజీల్లో షేర్ చేసి ఇతరులను కాన్ఫరెన్స్లోకి ఆహ్వానించే వీలుందని వెల్లడించింది. హోస్ట్కు కాల్ను నియంత్రించే అధికారాలు ఉంటాయని స్పష్టం చేసింది. ఫేస్బుక్లో ఖాతా ఉన్నవారెవరైనా వీడియో కాల్ను క్రియేట్ చేసే వీలుందని తెలిపింది.
