తమ పోర్ట్ఫోలియోలో డీజిల్ మోడళ్లకు బలమైన డిమాండ్ను సాధిస్తున్నట్టు హ్యుందాయ్ మోటర్స్ ఇండియా తెలిపింది. బీఎస్-6 ఉద్గారాల మోడళ్లలోనూ అదే సాంకేతిక పరిజ్ఞానాన్ని కొనసాగించాలనే తమ వైఖరి సరియైనదేనని ఈ పరిణామాలు నిరూపిస్తున్నాయని కంపెనీ సీనియర్ అధికారి ఒకరు తెలిపారు.
ఈ ఏడాది ఏప్రిల్ నుంచి బీఎస్-6 ఉద్గార నియమాలు అమలులోకి వచ్చాయి. ఈ క్రమంలో డీజిల్ మోడళ్లకు స్వస్తి పలకాలని దేశీయ అతిపెద్ద కార్ల తయారీ సంస్థ మారుతీ సుజూకీ నిర్ణయించింది. అయితే, దేశ రెండో అతిపెద్ద ప్రయాణ వాహనాల తయారీ సంస్థ అయిన హ్యుందాయ్ మోటర్స్.. తమ పోర్ట్ఫోలియోలో డీజిల్ వాహనాల ఉత్పత్తిని కొనసాగించాలని నిర్ణయించటం గమనార్హం.
పలు వాహన తయారీదారులు డీజిల్ వాహనాలు, ముఖ్యంగా చిన్న కెపాసిటీ ఇంజిన్ల ఉత్పత్తిని నిలిపేయాలని నిర్ణయించాయి. చిన్న డీజిల్ కార్లు ఖరీదైనవిగా మారి, తొలిసారి కారు కొనాలనుకునే వారికి ప్రియంగా మారుతాయని భావిస్తుండటమే ఇందుకు కారణం. టాటా మోటర్స్, టయోటా కిర్లోస్కర్ వంటి సంస్థలు ఇప్పటికే చిన్న సామర్థ్యం గల డీజిల్ ఇంజిన్లను పక్కనపెట్టాయి. బహుళ ప్రయోజన వాహనాలు, ఎస్యూవీల్లో అధిక సామర్థ్యం గల పవర్ట్రైన్స్ ఇంజిన్లనే వినియోగిస్తున్నాయి.
డీజిల్ వాహనాలకే జై..
క్రేటాలో ఇప్పటికీ 60 శాతం మంది డీజిల్ వాహనాలకే ప్రాధాన్యం ఇస్తున్నారని పేర్కొన్నారు హ్యుందాయ్ మోటర్స్ డైరెక్టర్ (సెల్స్, మార్కెటింగ్, సర్వీస్) తరుణ్ గార్గ్. వెన్యూ, వెర్నా వాహనాల్లోనూ 33శాతం మంది వినియోగదారులు డీజిల్ కార్లనే కోరుకుంటున్నట్లు తెలిపారు.
"గత 10ఏళ్లుగా డీజిల్ వాహనాలకు భారత్ అతిపెద్ద మార్కెట్. వినియోగదారులు ఆహ్లాదకరమైన డ్రైవింగ్, అధిక మైలేజ్, అధిక సామర్థ్యాన్ని కోరుకుంటున్నారు. అందుకే ఆ వాహనాలను కొనుగోలు చేస్తున్నారు. డీజిల్ కార్లు కొనుగోలు చేయాలనుకునే వారు అకస్మత్తుగా ఎక్కడికి వెళతారు? అదే విషయాన్ని హ్యుందాయ్ గమనించింది. మేము విక్రయిస్తున్న వాహనాల సంఖ్యనే మా వైఖరి సరైందని నిరూపిస్తోంది."
- తరుణ్ గార్గ్, హ్యుందాయ్ మోటర్స్ డైరెక్టర్
డీజిల్ వాహనాలకు మంచి డిమాండ్ ఉన్న దేశంలోని పలు ప్రాంతాల్లో ఇప్పటికీ అదే ధోరణి కొనసాగుతోందన్నారు గార్గ్. మహారాష్ట్ర, ఉత్తర్ప్రదేశ్, మధ్యప్రదేశ్, ఆంధ్రప్రదేశ్, తెలంగాణ వంటి రాష్ట్రాలు డీజిల్ వాహనాలకు బలమైన మార్కెట్లుగా పేర్కొన్నారు. వినియోగదారులకు తమ వాహనాన్ని ఎంచుకునే అవకాశాన్ని సంస్థ కల్పించగలగుతుందనే నమ్ముతున్నట్లు తెలిపారు. కస్టమర్ల ఆలోచనకు తగ్గట్టుగా పెట్రోల్, డీజిల్, టర్బో, సీఎన్జీల వేరియంట్లలో అందించటం ద్వారా, తమ లక్ష్యాన్ని సాదించగలుగుతామన్నారు.
హ్యుందాయ్ మోటర్స్ ప్రస్తుతం దాని ఉత్పత్తి శ్రేణిలో 1.2 లీటర్లు, 1.5 లీటర్లు, 2 లీటర్ల కెపాసిటీ ఇంజిన్లతో సహా బీఎస్-6 కంప్లైంట్ డీజిల్ పవర్ట్రైన్లను ఉపయోగిస్తోంది. సంస్థ ఇటీవల విడుదల చేసిన ఐ20లో కూడా 1.5 లీటర్ల ఇంజిన్ కలిగి ఉంది. ఐ20 విక్రయాల్లో 50 శాతం డీజిల్ వాహనాలే. కొత్త ఇంజిన్, పవర్ట్రైన్ అవకాశాలతో వినియోగదారులకు మరింత చేరువవుతామని సంస్థ పేర్కొంది.
ఇదీ చూడండి: మార్కెట్లోకి ఐ20 కొత్త మోడల్- ధర, ఫీచర్లు ఇవే
