బడ్జెట్ ప్రత్యేక సెషన్లో స్టాక్ మార్కెట్లు కుప్పకూలాయి. మదుపరులు ఆశించినట్లు కేంద్ర బడ్జెట్లో సంస్కరణలు లేకపోవడం కారణంగా బొంబాయి స్టాక్ ఎక్స్చేంజి సూచీ-సెన్సెక్స్ 988 పాయింట్లు క్షీణించి 39,735 వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 300 పాయింట్లు కోల్పోయి 11,662 వద్ద ముగిసింది.
రికార్డు స్థాయి నష్టాలతో మదుపర్ల సంపద ఈ ఒక్కరోజే 3.46 లక్షల కోట్లు ఆవిరైంది.
పద్దు నిరాశలు...
ఆదాయపు పన్ను పరిమితి పెంపు, స్లాబులను సవరించినప్పటికీ.. దీన్ని ఐచ్ఛికంగా నిర్ణయించింది కేంద్రం. ఆర్థిక వృద్ధి మందగమనం నేపథ్యంలో భారీ ఊరటనిచ్చే దిశగా బడ్జెట్లో చర్యలు ఉంటాయని భావించిన మదుపరులకు ఈ అంశం తీవ్ర నిరాశ కలిగించింది. ఫలితంగా అమ్మకాలు వెల్లువెత్తి.. మార్కెట్లు రికార్డుస్థాయి నష్టాల్లోకి జారుకున్నాయి.
ఇంట్రాడే సాగిందిలా..
సెన్సెక్స్ 40,906 పాయింట్ల గరిష్ఠాన్ని తాకగా.. 39,631 పాయింట్ల వద్ద కనిష్ఠాన్ని నమోదు చేసింది.
నిఫ్టీ నేడు 12,017 పాయింట్ల అత్యధిక స్థాయి, 11,639 పాయింట్ల అత్యల్ప స్థాయిల మధ్య కదలాడింది.
లాభనష్టాల్లోనివివే..
టీసీఎస్ 4.13 శాతం, హెచ్యూఎల్ 1.94 శాతం, నెస్లే ఇండియా 1.68 శాతం, టెక్ మహీంద్రా 1.52 శాతం, ఇన్ఫోసిస్ 0.50 శాతం, భారతీ ఎయిర్టెల్ 0.13 శాతం లాభాలను నమోదు చేశాయి. 30 షేర్ల ఇండెక్స్లో ఈ 6 షేర్లు మాత్రమే లాభపడ్డాయి.
ఐటీసీ 6.97 శాతం, ఎల్&టీ 5.98 శాతం, హెచ్డీఎఫ్సీ 5.87 శాతం, ఎస్బీఐ 4.83 శాతం, ఓఎన్జీసీ 4.18 శాతం, ఐసీఐసీఐ బ్యాంక్ 4.01 శాతం నష్టాలను మూటగట్టుకున్నాయి.
ఇదీ చూడండి:'ఉద్యోగాల భర్తీకి జాతీయస్థాయి రిక్రూట్మెంట్ ఏజెన్సీ'
