కరోనాపై పోరుకు ప్రముఖ బిలియనీర్ గౌతమ్ అదాని ముందుకొచ్చారు. తమ సంస్థ నుంచి పీఎం కేర్స్ ఫండ్కు రూ.100 కోట్ల విరాళం ఇస్తున్నట్లు ప్రకటించారు. సంస్థలోని ఉద్యోగులంతా కలిసి మరో రూ.4 కోట్లను అందజేశారు. ఈ మేరకు కరోనాపై భారత్ చేస్తున్న పోరాటానికి అదాని గ్రూప్ తమ వంతు స్వేదాన్ని చిందిస్తుందని పేర్కొన్నారు.
ప్రపంచ దేశాలన్నీ కట్టుదిట్టమైన చర్యలతో లాక్డౌన్ విధించినప్పటికీ.. మహమ్మారి ఎంతో మంది ప్రాణాల్ని బలిగొంటోందని ఆవేదన వ్యక్తం చేశారు అదాని.
కొన్ని దశాబ్దాల తర్వాత మన పిల్లలు వెనక్కి తిరిగి చూస్తే.. ఈ దేశ పౌరులుగా ఉన్నందుకు వారు గర్వించాలి. భారతీయులంతా మహమ్మారిపై పోరాటానికి ప్రభుత్వంతో ఐక్యంగా నిలబడ్డారని తెలుసుకోవాలి.
గౌతమ్ అదాని, అదాని గ్రూప్ ఛైర్మన్
లాక్డౌన్ కారణంగా ప్రజలకు ఎలాంటి ఆటంకం కలగకుండా నిరంతం శ్రమిస్తున్న వారికి కృతజ్ఞతలు తెలిపారు అదాని. ఈ మహమ్మారిపై కేంద్ర, రాష్ట్ర ప్రభుత్వాలు తీవ్రంగా శ్రమిస్తున్నాయని.. వారికి తమ వంతు సాయం అందించినట్లు పేర్కొన్నారు.
మరోవైపు గుజరాత్ సీఎం రిలీఫ్ ఫండ్కు అదాని ఫౌండేషన్ రూ.5 కోట్లను అందజేసింది. మహారాష్ట్రకూ కోటి రూపాయల విరాళం ప్రకటించారు అదాని. వీటితో పాటు అహ్మదాబాద్లోని మునిసిపల్ కార్పొరేషన్ ఆసుపత్రిలో 100 వెంటిలేటర్లు, ఎన్-95 మాస్కుల సదుపాయాన్ని కల్పించనున్నట్లు పేర్కొన్నారు.
