ప్రపంచవ్యాప్తంగా గత ఏడాది స్మార్ట్ఫోన్ మార్కెట్ కాస్త గడ్డు కాలం ఎదుర్కొన్నట్లు తెలుస్తోంది. ఓ ప్రముఖ సంస్థ సర్వేలో 2019లో స్మార్ట్ఫోన్ అమ్మకాలు 2 శాతం క్షిణించినట్లు తేలింది. 2008 తర్వాత అమ్మకాలు క్షీణించడం ఇదే తొలిసారి అని గార్ట్నర్ నివేదిక తెలిపింది.
ఈ ఏడాది సానుకూలమే..
గత ఏడాది అమ్మకాలు కాస్త క్షీణించినప్పటికీ.. స్మార్ట్ఫోన్ల వ్యాపారం ఈ ఏడాది తిరిగి పుంజుకుంటుందని నివేదిక అంచనా వేసింది. 2020లో మొత్తం 1.57 బిలియన్ యూనిట్లు విక్రయమయ్యే అవకాశముందని పేర్కొంది.
5జీ వస్తోంది..
ముఖ్యంగా 5జీ సాంకేతికత అనేక దేశాలకు విస్తరించనుండటం స్మార్ట్ఫోన్ల అమ్మకాలు పెరిగేందుకు ఊతమందించనున్నట్లు గార్ట్నర్ నివేదిక తెలిపింది.
మరోవైపు ఫోన్ల ధరలు తగ్గుతాయని గత ఏడాది కొనుగోళ్లు వాయిదా వేసుకున్న వాళ్లు ఈ ఏడాది అందుకు సరైన సమయంగా భావించొచ్చని.. ఫలితంగా స్మార్ట్ఫోన్ మార్కెట్లో వృద్ధి నమోదు అవుతుందని అంచనా వేసింది.
ఈ ఏడాది మొత్తం మీద 221 మిలియన్ల 5జీ స్మార్ట్ఫోన్లు అమ్ముడయ్యే అవకాశముందని.. 2021 నాటికి వీటి సంఖ్య 489 మిలియన్లకు చేరే అవకాశముందని నివేదిక అభిప్రాయపడింది.
నివేదిక పేర్కొన్న కీలక విషయాలు..
ఈ ఏడాది చాలా దేశాల్లో 5జీ వాణిజ్య సేవలు ప్రారంభయ్యే అవకాశాలు ఉన్నాయి. 5జీ స్మార్ట్ఫోన్ ధర 300 డాలర్ల కన్నా తక్కువగా ఉంటాయన్న ప్రకటనల కారణంగా.. అమ్మకాల్లో వృద్ధి నమోదయ్యే అవకాశాలు కనిపిస్తున్నాయి.
5జీ స్మార్ట్ఫోన్లకు, యాపిల్ నుంచి రానున్న తొలి 5జీ స్మార్ట్ఫోన్పై భారీ అంచనాలు ఉన్నాయి. ఈ కారణంగా ఆసియా పసిఫిక్, గ్రేటర్ చైనా ప్రాంతాల్లో స్మార్ట్ఫోన్ మార్కెట్లో భారీ డిమాండ్ ఉండొచ్చని తెలుస్తోంది.
భారత మార్కెట్ ఇలా..
మిడ్ రేంజ్ మొబైళ్లకు పెరుగుతున్న డిమాండ్ కారణంగా ఈ ఏడాదీ భారత్లో స్మార్ట్ఫోన్ల అమ్మకాలు వృద్ధి చెందొచ్చు.
ప్రీమియం ఫీచర్లు, భారీ కెమెరా, అధునాతన డిస్ప్లేలతో కూడిన మొబైళ్లు సరసమైన ధరలకు లభించడమూ భారత్లో ఈ ఏడాది స్మార్ట్ఫోన్ మార్కెట్ వృద్ధికి కారణం కానుంది.
