Wholesale Price Inflation: టోకు ధరల ఆధారిత ద్రవ్యోల్బణం(డబ్ల్యూపీఐ) మళ్లీ పెరిగింది. నవంబర్లో టోకు ద్రవ్యోల్బణం 14.23 శాతంగా నమోదైనట్లు వాణిజ్య, పరిశ్రమల మంత్రిత్వ శాఖ వెల్లడించింది. ఆహార వస్తువుల ధరల పెరుగుదల కారణంగానే టోకు ద్రవ్యోల్బణం(Wpi inflation) ఎగబాకినట్లు పేర్కొంది.
డబ్ల్యూపీఐ(Wpi inflation) రెండంకెలపైన నమోదవడం వరుసగా ఇది ఎనిమిదో నెల కావడం గమనార్హం. అక్టోబరులో టోకు ద్రవ్యోల్బణం 12.54 శాతంగా ఉంది. గత ఏడాది నవంబర్లో ద్రవ్యోల్బణం 2.29 శాతంగా ఉంది.
ఇదే కారణం..
మినరల్ ఆయిల్స్, బేసిక్ మెటల్స్, తయారీ వస్తువులు, ఆహార ఉత్పత్తులతో పాటు ఇతర వస్తువుల ధరలు పెరగడమే.. నవంబర్లో టోకు ద్రవ్యోల్బణం పెరిగేందుకు ప్రధాన కారణమని కేంద్రం పేర్కొంది.
తయారీ వస్తువులపై టోకు ద్రవ్యోల్బణం నవంబర్లో 11.92 శాతంగా నమోదైంది. ఇది గత నెలలో 12.04 శాతం మాత్రమే ఉంది.
ముడి చమురు ద్రవ్యోల్బణం నవంబర్లో 91.74 శాతంగా నమోదైనట్లు వెల్లడించింది. ఇది అక్టోబర్లో 80.57 శాతంగా ఉందని పేర్కొంది.
ఆహార వస్తువుల టోకు ద్రవ్యోల్బణం రెండింతలు పెరిగి 6.70 శాతానికి చేరింది. అక్టోబర్ నెలలో ఇది 3.06శాతంగా ఉండేది.
ఇదీ చూడండి: మళ్లీ పెరిగిన రిటైల్ ద్రవ్యోల్బణం- నవంబర్లో 4.91శాతం
