GST On Textiles: దుస్తులపై వస్తు, సేవల పన్నును(జీఎస్టీ) 12 శాతం పెంచాలన్న ప్రతిపాదనపై జీఎస్టీ మండలి వెనక్కి తగ్గింది. ఈ నిర్ణయాన్ని తాత్కాలికంగా నిలిపి వేయాలని ఏకగ్రీవంగా తీర్మానించింది. వస్త్రాలపై ప్రస్తుతం ఉన్న 5 శాతం జీఎస్టీనే కొనసాగిస్తున్నట్లు కేంద్ర ఆర్థిక మంత్రి నిర్మలా సీతారామన్ తెలిపారు.
దిల్లీలో కేంద్ర ఆర్థిక మంత్రి నిర్మలా సీతారామన్ అధ్యక్షతన జరిగిన 46వ జీఎస్టీ మండలి సమావేశమైంది. ఈ భేటీలో పాల్గొన్న రాష్ట్రాల ఆర్థిక మంత్రుల అభ్యర్థన మేరకు దుస్తులపై జీఎస్టీని యథాతథంగా కొనసాగిస్తున్నట్లు ఆమె పేర్కొన్నారు. అయితే వస్త్రాలపై జీఎస్టీ రేటు అంశాన్ని పన్ను రేట్ల హేతుబద్ధీకరణ కమిటీకి పంపుతామని.. అది 2022 ఫిబ్రవరి నివేదిక సమర్పిస్తుందని సీతారామన్ వెల్లడించారు.
"దుస్తులపై జీఎస్టీ రేటును 12 శాతానికి పెంచకూడదని.. ప్రసుత్తం ఉన్న 5 శాతాన్నే కొనసాగించాలని జీఎస్టీ మండలి సమావేశంలో నిర్ణయించాం. వస్త్రాలపై జీఎస్టీ రేటు అంశాన్ని పన్ను రేట్ల హేతుబద్ధీకరణ కమిటీకి పంపుతాం. అది ఫిబ్రవరిలోగా తన నివేదికను సమర్పిస్తుంది."
- కేంద్ర ఆర్థికమంత్రి నిర్మలా సీతారామన్
పాదరక్షలపై తగ్గేదేలే
అయితే పాదరక్షలపై జీఎస్టీ పెంపు ప్రతిపాదనను వెనక్కి తీసుకోవాలన్న రాష్ట్రాలు డిమాండ్ను అంగీకరించలేదని సీతారామన్ స్పష్టం చేశారు. ఫలితంగా ధరలతో సంబంధం లేకుండా అన్ని రకాల పాదరక్షలపై 5 నుంచి 12 శాతానికి పెంచిన జీఎస్టీ జవనరి 1 నుంచి అమల్లోకి రానుంది.
ఒక్క రోజు ముందు...
ఇటీవల చెప్పులు, దుస్తులపై 5 శాతం ఉన్న జీఎస్టీని 12శాతానికి పెంచారు. ఈ రేట్లు 2022 జనవరి 1న అమల్లోకి రావాల్సి ఉంది. అయితే దీనిపై చేనేత కార్మికులు, వ్యాపారుల నుంచి తీవ్ర అభ్యంతరాలు వ్యక్తమయ్యాయి. రేట్లు పెంచడం వల్ల చిన్న వ్యాపారులపై తీవ్ర ప్రభావం పడుతుందన్నది వారి వాదన. ఈ నేపథ్యంలో దుస్తులపై పన్ను పెంపు నిర్ణయాన్ని వాయిదా వేసినట్లు తెలుస్తోంది.
ప్రస్తుతం మ్యాన్ మేడ్ ఫైబర్పై(ఎంఎంఎఫ్) పన్ను రేటు 18 శాతం, ఎంఎంఎఫ్ నూలుపై 12 శాతం, దుస్తులపై 5 శాతం పన్ను విధిస్తున్నారు.
ఇదీ చూడండి: ప్రపంచ దిగ్గజ బ్యాటరీ సంస్థ.. ఇప్పుడు రిలయన్స్ సొంతం
